Abureńniem, usieahulnaj źbiantežanaściu i biazładnymi dyskusijami na pavyšanych tonach zaviaršylisia 2 sakavika amal piacihadzinnyja hramadskija słuchańni ŭ Vilenskim univiersitecie, pryśviečanyja acency ŭździejańnia na navakolnaje asiarodździe budučaj biełaruskaj AES.
Mnohija ŭdzielniki raniej pakinuli aŭdytoryju z pryčyny nizkaha ŭzroŭniu pierakładu, arhanizavanaha biełaruskim pasolstvam.
"U vypadku, nie daj Boh, avaryi, u nas budzie źniščana stalica, terytoryja krainy zabrudžana na 80%. Čamu ničoha hetaha niama ŭ spravazdačy? Heta ž hienacyd litoŭskaha naroda!" — zajaviła namieśnik staršyni kamisii raźvićcia Vilenskaha haradskoha savieta i pradstaŭnik niekalkich hramadskich arhanizacyj Rasa Navickienie.
"Čamu nam kažuć, što niama naohuł nijakaj niebiaśpieki? Heta takoje staŭleńnie da litoŭskaha naroda, što my takija nieadukavanyja i ničoha nie razumiejem? Budu rabić usio mahčymaje, kab Litva nie ŭchvaliła takuju spravazdaču AUNA", — skazała Navickienie.
Ź joj pahadziŭsia staršynia ekałahičnaha tavarystva "Athaja" Saŭlus Pikšrys: "Ja padrychtavaŭ šmat pytańniaŭ, ale pa vopycie ekspłuatacyi Ihnalinskaj AES ubačyŭ, što niama sensu ich zadavać. Toje, što tut kazali, vyklikaje prosta śmiech — šmat strojnych i praciahłych pramoŭ ni ab čym, na kankretnyja pytańni adkaz dadzieny nie byŭ. Słuchańnie AUNA nielha pryznać sapraŭdnym".
Padčas impravizavanaha hałasavańnia, da abureńnia biełaruskaha pasła Uładzimira Dražyna, zajava była ŭchvalena padniaćciem ruk bolšaści prysutnych u zale. "Pa jakim pravie vy pravodzicie hałasavańnie? My jašče nie prymajem rašeńnia", — skazaŭ Dražyn. "A my, schod, užo pryniali", — zajaviła Navickienie.
Razam z tym niekatoryja pradstaŭniki litoŭskaha boku vykazalisia ŭ padtrymku prajekta.Biełarus ź Visahinasa Aleh Davidziuk, były načalnik adździeła Ihnalinskaj AES, nahadaŭ, što AES budujuć u mnohich raźvitych krainach. "Padčas pracy Ihnalinskaj stancyi biełarusy svaju stancyju naŭrad tut by stavili, zaraz jana zapaŭniaje akno, jakoje ŭtvaryłasia. Jość prymaŭka: za što zmahalisia, na toje i natknulisia", — zaznačyŭ Davidziuk.
Pavodle jaho słoŭ,
sotni budaŭnikoŭ i ekspłuatacyjnych śpiecyjalistaŭ Visahinasa ŭžo zaraz hatovy jechać na budaŭnictva ŭ Astraviec.
Paśla zakančeńnia schodu Dražyn zajaviŭ žurnalistam, što, niahledziačy na ciažkaści, udzielniki schodu zmahli zrazumieć adzin adnaho i varta ličyć, što słuchańni adbylisia.
Z hetym nie pahadzilisia nie tolki litoŭcy, ale i pradstaŭniki biełaruskaj hramadskaści, jakija pryjechali ŭ Vilnius.
"Ja ździviłasia, jak drenna byli arhanizavany słuchańni, nie kažučy ŭžo pra jakaść adkazaŭ na pytańni litoŭskaha Ministerstva achovy navakolnaha asiarodździa, — zajaviła staršynia arhanizacyi "Ekadom" Iryna Suchij. — Na pytańnie ab dozie apramieńvańnia ŭ Vilni našy nie adkazali naohuł".
"Spravazdača ab AUNA zroblena niadobrasumlenna, z mnostvam najhrubiejšych pamyłak", — miarkuje Suchij.
Inšaje mierkavańnie ŭ staršyni Nacyjanalnaj kamisii pa radyjacyjnaj abaronie pry Saviecie ministraŭ Biełarusi Jakava Kienihśbierha: "Kali my vierym vam, čamu vy nie chočacie pavieryć nam? Za ŭvieś čas ekspłuatacyi vašaj Ihnalinskaj AES nie zafiksavana nivodnaha vypadku niepažadanaha ŭździejańnia. Niaŭžo vy dumajecie, što my vorahi našaha ŭłasnaha naroda?"
Pry hetym Kienihśbierh nie admaŭlaŭ tearetyčnuju mahčymaść avaryi i spasłaŭsia na normy biaśpieki MAHATE: "Niahledziačy na ŭsie miery pieraściarohi, zaŭsiody isnuje vierahodnaść taho, što admova pracy abo avaryja moža pryvodzić da ŭźniknieńnia jadziernaj avaryjnaj situacyi".
"My ŭžo atrymali aficyjnyja źviestki z Rasii, jakija paćviardžajuć pravilnaść usich našych raźlikaŭ", — zajaviŭ kiraŭnik biełaruskaj delehacyi namieśnik dyrektara RUP "BiełNDVIenierhapram" Uładzimir Babroŭ.
Paśla zakančeńnia słuchańniaŭ litoŭskaja hramadskaść pavinna da kanca miesiaca nakiravać svaju reakcyju ŭ Ministerstva achovy navakolnaha asiarodździa krainy. Z ulikam hetych pažadańniaŭ Litva sfarmiruje pazicyju pa budaŭnictvie Biełaruśsiu AES, ale pravam vieta jana, jak lubaja zamiežnaja dziaržava, nie vałodaje.
