Pradprymalniki handlovych radoŭ «Čarnihaŭskija» ŭ Homieli praviali 15 sakavika stychijny mitynh u suviazi z prypynieńniem pracy rynku.
Na radach pracujuć prykładna 40 pradprymalnikaŭ. Pavodle ich słoŭ, 15 sakavika jany pryjšli na rynak i ŭbačyli, što varoty na terytoryju začynieny na zamok. Handlary nie zmahli siońnia pracavać, niahledziačy na toje što zapłacili arendnuju płatu, padatki, zakupili dla realizacyi pradukty, mnohija ź jakich chutka psujucca.
Praca na rynku była prypyniena pastanovaj hałoŭnaha sanitarnaha doktara Homiela Raścisłava Zinoviča, bo pradpisańnie dziaržsannahladu ad 24 krasavika 2008 hoda pa palapšeńni sanitarna‑techničnaha stanu handlovych radoŭ nie było vykanana, rekanstrukcyja nie pravodzicca. Na padstavie hetaha sanstancyja pastanaviła prypynić z 15 sakavika ekspłuatacyju handlovych radoŭ «Čarnihaŭskija» da ŭstaranieńnia parušeńniaŭ. Adkaznaść za vykanańnie pastanovy ŭskładziena na ŭłaśnika rynku — kamunalnaje žyllovaje ramontna‑ekspłuatacyjnaje unitarnaje pradpryjemstva (KŽREUP) «Navabielickaje».
11 sakavika pradprymalniki byli prainfarmavany pra skasavańnie dahavora ab vydzialeńni handlovych miescaŭ na rynku z 15 sakavika ŭ suviazi z prypynieńniem pracy handlovych radoŭ.
Pradprymalniki ličać, što vykanać pradpisańnie sanstancyi pavinien byŭ ułaśnik rynku.
U suviazi z hetym jany padrychtavali adozvu da haradskich uład i sabrali bolš za 700 podpisaŭ žycharoŭ mikrarajona Navabielicki z prośbaj nie zakryvać rynak.
Pradprymalnica Hanna Kryčaŭcova zajaviła, što handlary ličać pastanovu sanstancyi spraviadlivaj, ale vinavatym u nievykanańni pradpisańnia nazyvajuć ułaśnika rynku. «My zhodny finansavać rekanstrukcyju, ale ŭ razumnych miežach i pa prazrystych schiemach. My chočam pracavać, viedajučy, za što my płacim svaje hrošy», — skazała jana.
Jak paviedamiŭ namieśnik dyrektara KŽREUP «Navabielickaje» Juryj Paškoŭ, pradprymalniki byli papiaredžany 1 studzienia, što ŭ luby momant dahavory ab vydzialeńni handlovych miescaŭ na rynku mohuć być skasavany, kali sanstancyja vydaść takuju pastanovu. «10 sakavika sanstancyja vydała pastanovu, i pra heta adrazu prainfarmavali pradprymalnikaŭ. Rekanstrukcyja rynku prachodzić ciažka — z‑za niedastatkovaha finansavańnia tymi ž pradprymalnikami. Hetyja ŭsie prablemy my budziem vyrašać, budziem imknucca zrabić tak, kab usie baki zastalisia zadavolenyja», — paabiacaŭ Paškoŭ.
