U Minsku na praciahu 2010—2011 hadoŭ zapłanavana ŭźviadzieńnie pomnika kłasiku biełaruskaj litaratury Uładzimiru Karatkieviču (26.11.1930—25.07.1984). Hetaje praduhledžvaje płan padrychtoŭki i śviatkavańnia 80‑hodździa z dnia naradžeńnia piśmieńnika.
U płanie, zaćvierdžanym ministram kultury Paŭłam Łatuškam, adznačajecca, što pomnik pavinien być pabudavany sa srodkaŭ respublikanskaha i miascovaha biudžetaŭ, a adkaznaść za vykanańnie ŭskładziena na Minkultury i Minharvykankam.
U płan, jaki ŭklučaje 23 punkty, uvajšli mierapryjemstvy pa dobraŭparadkavańni doma‑muzieja Karatkieviča ŭ Oršy (Viciebskaja vobłaść), miemaryjalizacyi i dobraŭparadkavańni terytoryj i miaścin, źviazanych z žyćciom i dziejnaściu piśmieńnika, raźmiaščeńni na vulicach stalicy biłbordaŭ ź jaho partretam i nadpisam «80 hod z dnia naradžeńnia kłasika biełaruskaj litaratury U.Karatkieviča», a taksama pa praviadzieńni šerahu vystaŭ, u tym liku ŭ Nacyjanalnaj biblijatecy Biełarusi.
Praduhledžvajecca vypusk pamiatnaha kanvierta z aryhinalnaj paštovaj markaj i jaho śpiechašeńnie ŭ Oršy, praviadzieńnie ŭračystych viečaryn, u tym liku ŭ staličnym Domie družby, kancertaŭ, padčas jakich prahučać tvory na vieršy Karatkieviča, pakaz śpiektaklaŭ pavodle jaho tvoraŭ, stvareńnie filmaŭ — dakumientalnaha «Jon žyŭ Biełaruśsiu», čatyrochsieryjnaha televizijnaha mastackaha i kinaviersii pavodle ramana piśmieńnika «Kałasy pad siarpom tvaim», a taksama roznyja mierapryjemstvy va ŭstanovach adukacyi.
Akramia taho, zapłanavana raźmiaščeńnie ŭ elektronnych ŚMI śpiecyjalnych siužetaŭ, pryśviečanych piśmieńniku, nadańnie jaho imia vulicy ŭ Rahačovie (Homielskaja vobłaść), dzie žyŭ i pracavaŭ Karatkievič, a taksama vydańnie tvoraŭ kłasika.
Vypusk tvoraŭ pavinna ažyćciavić Ministerstva infarmacyi za košt respublikanskaha biudžetu i ŭłasnych srodkaŭ vydaviectvaŭ.
Staršynia Sajuza biełaruskich piśmieńnikaŭ Aleś Paškievič nahadaŭ, što vaśmitomny zbor tvoraŭ Karatkieviča vychodziŭ ŭ 1987—1991 hadach. Na jaho dumku, vydańnie poŭnaha zboru stanie «najvialikim i najaktualnym pomnikam biełaruskaj dziaržavy i ŭdziačnych čytačoŭ svajmu słaŭnamu prazaiku, paetu i dramaturhu». «I budzie vydatna, kali z zapłanavanaha ŭ našych umovach budzie vykanana bolšaja častka mierapryjemstvaŭ pa ŭhanaravańni pamiaci nacyjanalnaha hienija», — skazaŭ Paškievič.
