Pra heta 30 sakavika na pasiadžeńni kruhłaha stała ŭ Minsku paviedamiła načalnik adździeła vadapravodna‑kanalizacyjnaj haspadarki i dobraŭparadkavańnia ŭpraŭleńnia kamunalnaj haspadarki i enierhietyki Ministerstva žyllova‑kamunalnaj haspadarki Biełarusi Valancina Kačanoŭskaja.
Pavodle jaje słoŭ, rašeńnie ab budaŭnictvie akvaparka zamacavana ŭ halinovaj prahramie raźvićcia plažaŭ na vadajomach u miescach masavaha adpačynku nasielnictva na 2010—2015 hady, zaćvierdžanaj pastanovaj Minžyłkamhasu. Jak paviedamiła Kačanoŭskaja, pačatak budaŭnictva akvaparka zapłanavany na 2013 hod, adnak kančatkova miesca dla jaho raźmiaščeńnia jašče nie vybrana. Jana nahadała, što ŭ kancy minułaha hoda pačaŭ rabotu akvapark u Kobrynie (Bresckaja vobłaść).
Akramia hetaha, pavodle słoŭ Kačanoŭskaj, u ramkach hetaj prahramy płanujecca budaŭnictva 36 novych abjektaŭ u roznych rehijonach Biełarusi, siarod jakich 20 plažaŭ, try hidraparki, 12 nabiarežnych. Bolš za 500 miescaŭ masavaha adpačynku buduć poŭnaściu ŭkamplektavany plažnym abstalavańniem, niekatoryja ź ich buduć abstalavany aŭtastajankami, dziciačymi hulniavymi i spartyŭnymi placoŭkami, projdzie ramont padjaznych šlachoŭ i h.p.
Jak paviedamiŭ vykanaŭca abaviazkaŭ dyrektara UP «Minskzielenbud» Ihar Kušniarevič, sioleta pradpryjemstva płanuje abstalavać dla adpačynku plaž № 3 Cnianskaha vadaschovišča pad Minskam. Tam buduć pabudavany parkoŭki, hramadskaja prybiralnia, abstalavany miescy dla handlu, ustanoŭlena plažnaje abstalavańnie i h.p. U 2009 hodzie Minskzielenbud abstalavaŭ dla adpačynku plaž na vadaschoviščy Drazdy. Na dobraŭparadkavańnie plaža ŭ siarednim nieabchodna ad 4 da 6 młrd. rubloŭ.
Kušniarevič adznačyŭ, što da pačatku letniaha siezona buduć padrychtavanyja miescy adpačynku na šaści vadaschoviščach pablizu Minska — Zasłaŭskim, Drazdach, Krynicy, Viačy, Cnianskim, Pcičy. Buduć adramantavany i pafarbavany plažnaje abstalavańnie, hramadskija prybiralni, abnoŭleny darohi, praviedzieny sanitarnyja rubki lesu kala zon adpačynku, ustanoŭleny kantejniery dla śmiećcia.
