Alaksandr Łukašenka niezadavoleny addačaj ad raboty budaŭničaha kompleksu krainy. Pra heta jon zajaviŭ siońnia na naradzie pa raźvićciu budaŭničaj haliny Biełarusi.
«Davodzicca pryznać, što addačy ad raboty budaŭničaha kompleksu, adpaviednaj układzienym srodkam, my jašče nie atrymlivajem, — skazaŭ kiraŭnik dziaržavy. — Nielha skazać z poŭnaj upeŭnienaściu, što my navučylisia budavać chutka, tanna i jakasna».
Prezident nahadaŭ, što ŭ kryzisny pieryjad Biełaruś zrabiła staŭku na budaŭničy kompleks, kab jon jak łakamatyŭ paciahnuŭ za saboj usiu ekanomiku. «Heta taktyka pryniesła ŭžo peŭnuju karyść», — adznačyŭ jon.
Razam z tym, pavodle słoŭ biełaruskaha lidera, dapuskajecca vielmi šmat pamyłak pry prajektavańni budaŭničych abjektaŭ, vielmi vialikija srodki zatračvajucca na apłatu ich karekcirovak, zaciahvajucca terminy ŭviadzieńnia žylla ŭ ekspłuatacyju, adbyvajecca nieapraŭdanaje padaražeńnie žylla. «Pa‑raniejšamu niaredka prymajucca ŭ lik dziejučych abjekty, na jakich nie vykanany ŭsie nieabchodnyja raboty, z‑za čaho jany nie hatovy da narmalnaj ekspłuatacyi.
Zastajucca vializnymi abjomy niezavieršanaha budaŭnictva», — padkreśliŭ Alaksandr Łukašenka.
Kiraŭnik dziaržavy taksama źviarnuŭ uvahu na toje, što patencyjał haliny drenna vykarystoŭvajecca dla naroščvańnia ekspartu budaŭničych materyjałaŭ i pasłuh. «Darečy, heta toje, što my ŭmiejem rabić nie horš, čym inšyja suśvietnyja kampanii. My ŭmiejem prajektavać i budavać na ŭzroŭni suśvietnych standartaŭ. Ale budavać vy idziacie za miažu tolki tady,
kali adčuvajecie zzadu vielmi vostryja viły ŭ śpinu», — aburyŭsia prezident.
Alaksandr Łukašenka skazaŭ, što pa vynikach 2009 hoda abjom ekspartu budaŭničych pasłuh skaraciŭsia na 36,6 pracenta ŭ paraŭnańni z papiarednim hodam, skłaŭšy ŭsiaho $76,9 młn. «U bližejšyja hady nieabchodna pavialičyć ekspart budaŭničych pasłuh u razy», — zapatrabavaŭ biełaruski lider ad kiraŭnikoŭ haliny. «Pry hetym srodki, što zatračvajucca budaŭničymi arhanizacyjami, — mizer u paraŭnańni z tymi cenami, jakija budaŭničaja halina mieła apošnim časam, — adznačyŭ Prezident. — Heta hałoŭnaja była krynica pastupleńnia srodkaŭ u budaŭničyja arhanizacyi». «Pry hetym žudasnaja raschlabanaść, pačynajučy ad prajekciroŭki zbudavańnia i da jaho ŭvodu ŭ ekspłuatacyju, nie dała mahčymaść mieć narmalny biudžet budaŭničaj haliny. Heta niedapuščalna», — padkreśliŭ jon.
Prezident taksama nahadaŭ, što jašče 2 hady tamu im było dadziena daručeńnie da kanca 2009 hoda ŭvieści ŭ dziejańnie ŭ Biełarusi normy prajektavańnia i standarty Jeŭrasajuza ŭ halinie budaŭnictva. «Heta daručeńnie było dadziena, tamu što da mianie vałam pajšli pradprymalniki i pačali skardzicca: da jakoj pary my budziem budavać pa niejkich normach navat nie XX, a XIX stahodździa. Da jakoj pary budziem lišnija hrošy buchać u heta budaŭnictva i z‑za hetaha nie možam aryjentavacca na našych susiedziaŭ, — rastłumačyŭ jon. — Toje ž samaje havaryli mnie pry budaŭnictvie «Minsk — Areny».
«I dzie byli členy ŭrada, kali ja davaŭ hetyja daručeńni? Jany što, nie čuli?
I, akazvajecca, siońnia znoŭ patrebny daručeńni kiraŭnika dziaržavy, kab sabracca, abmierkavać i ŭvieści narešcie tyja pieradavyja normy, jakimi śviet karystajecca ŭžo daŭno, — aburyŭsia Prezident. — Dobra, što my choć u Vieniesuele nie pačali budavać damy ź vializnaj taŭščynioj ścienki — marozaŭstojlivaj dla ŭmoŭ Biełarusi. Dobra, što choć tut zaryjentavalisia i nie pačali tam prajektavać tak, jak u nas».
Prezident skazaŭ, što tamu čakaje adkazu na pytańnie, što realna zroblena pa ŭviadzieńniu jeŭrapiejskich standartaŭ, pašyreńniu hieahrafii i pavieličeńniu abjomu ekspartu biełaruskich pasłuh i pryciahnieńniu zamiežnych inviestycyj u budaŭničuju halinu Biełarusi. Alaksandr Łukašenka taksama kanstatavaŭ, što ŭ ahulnym abjomie budaŭniča‑mantažnych rabot, što vykonvajucca ŭ krainie, arhanizacyi, padparadkavanyja Ministerstvu architektury i budaŭnictva, składajuć tolki niekalki pracentaŭ. «Dzie vašy budaŭničyja arhanizacyi, kudy vy ich schavali?» — zapytaŭ kiraŭnik dziaržavy. Jon pacikaviŭsia, što robicca pa kaardynacyi raboty astatnich budaŭničych arhanizacyj.
Łukašenka asabliva padkreśliŭ, što nabalełym pytańniem zastajecca budaŭnictva žylla dla majučych patrebu. «Što robicca, kab jano stała bolš dastupnym? Heta pytańnie nie tolki da ministra, ale i da staršyni Praŭleńnia Nacyjanalnaha banka i pradstaŭnikoŭ miascovaj ułady», — skazaŭ Alaksandr Łukašenka.
«Ja chacieŭ by, kab nie tolki ministr architektury, ale i premjer‑ministr i inšyja členy ŭrada dałažyli ab vykanańni ŭsich tych daručeńniaŭ, jakija mnoj byli dadzieny — ad budaŭnictva daroh da ŭviadzieńnia jeŭrastandartaŭ. Ja chaču pahladzieć, nakolki sumlenna i adkazna pracujuć členy ŭrada», — reziumavaŭ biełaruski lider.
