Ministerstva justycyi Biełarusi čarhovy raz admoviła ŭ dziaržaŭnaj rehistracyi maładziožnamu abjadnańniu «Małady front». Heta była šostaja sproba rehistracyi arhanizacyi.
Apošni ŭstanoŭčy źjezd «Maładoha frontu» prajšoŭ 30 studzienia 2010 hoda, a dakumienty na rehistracyju byli padadzienyja 28 lutaha.
Jak paviedamiŭ pres‑sakratar arhanizacyi Stanisłaŭ Stesik, paviedamleńnie Miniusta padpisana 1 krasavika. Padstavaj dla admovy staŭ jurydyčny adras abjadnańnia, jaki, jak ličyć Miniust, nie adpaviadaje patrabavańniam zakanadaŭstava.
«Taksama čarhovy raz adzin z vyšejšych jurydyčnych instytutaŭ Respubliki Biełaruś ‑‑ Ministerstva justycyi ‑‑ paćvierdziła isnavańnie «prezumpcyi vinavataści» zasnavalnikaŭ «Maładoha frontu», ‑ adznačyŭ Stesik.
U pryvatnaści, jak paviedamlajecca ŭ admovie, «zhodna sa źviestkami, jakija majucca ŭ Ministerstvie justycyi Respubliki Biełaruś,
43 zasnavalniki MHA «Małady front» (bolš za pałovu ad ich ahulnaj kolkaści), u tym liku amal usie členy kirujučaha orhana dadzienaha hramadskaha abjadnańnia, pryciahvalisia da administracyjnaj adkaznaści, mnohija ź ich ‑‑ nieadnarazova, u tym liku za pravaparušeńni, źviazanyja z parušeńniem hramadskaha paradku, pravoŭ i svabod druhich asobaŭ».
Tak, padličyŭ Miniust, staršynia abjadnańnia Dźmitryj Daškievič pryciahvaŭsia da administracyjnaj adkaznaści 16 razoŭ, Ivan Šyła — 17, Kryścina Samojłava — 13, Dzianis Karnoŭ — 11 razoŭ.
«Vyšejaznačanaje nie śviedčyć ab namiery zasnavalnikaŭ MHA «Małady Front» ažyćciaŭlać dziejnaść u miežach zakanadaŭstva Respubliki Biełaruś, nie parušajučy hramadzki paradak, pravy i zakonnyja intaresy druhich hramadzian», — adznačajecca ŭ adkazie Miniusta.
Jak zajaviŭ lider arhanizacyi Źmicier Daškievič, «Małady front» budzie i dalej pravodzić ustanoŭčyja źjezdy. «Kožnyja try miesiacy my budziem pravodzić ustanoŭčyja źjezdy, i Ministerstva justycyi pavinna budzie davać nam zakanadaŭča abhruntavanyja adkazy, čamu jany nie rehistrujuć arhanizacyju», — skazaŭ Daškievič.
Zaraz «Małady front» maje status mižnarodnaha maładziožnaha hramadskaha abjadnańnia. U 2007 hodzie jon byŭ aficyjna zarehistravany ŭ Čechii.
