Z 11 pa 16 žniŭnia ŭ Budapiešcie projdzie vialiki jeŭrapiejski fiestyval Sziget. Udzieł u im voźmie i biełaruski hurt «Lapis Trubiacki». Pra fest raspaviadaje Viačasłaŭ Radzivonaŭ, kaardynatar prajekta ultra-music.com, infarmacyjnaha partniora Sziget u Biełarusi.
Viačasłaŭ Radzivonaŭ. Fota Juryja Siduna.
«Naša Niva»: Što saboj ujaŭlaje Sziget?
Viačasłaŭ Radzivonaŭ: Fiestyval prachodzić na vyśpie pasiarod Dunaja, faktyčna ŭ samym centry Budapiešta. Na vyśpie raźmiaščajecca piatnaccać scen, na jakich adbyvajucca kancerty. Siarod ich adna hałoŭnaja, na jakoj vystupajuć samyja viadomyja muzyki festu. I kala jaje źbirajecca najbolšaja kolkaść słuchačoŭ.
Aproč kancertnych scen šmat placovak dla teatralnych imprezaŭ, dla zabavaŭ. Usie žyvuć na vyśpie ŭ namiotach. Ale tam niama peŭnych miežaŭ. Namiot možna pastavić u lubym upadabanym miescy. I heta stvaraje atmaśfieru volnaści.
«NN»: Jakim čynam adbyvajucca kancerty: cełyja sutki ci tolki ŭ načny čas?
VR: Na niekatorych scenach vystupy adbyvajucca cełyja sutki. Heta ŭ asnoŭnym dance-sceny, tam, dzie elektronnaja muzyka. Ale na bolšaści vystupy pačynajucca paśla abiedu. I dzieści paśla kožnaj paŭtary hadziny vystupu kala hadziny doŭžycca pierapynak. Heta daje mahčymaść schadzić da inšaj sceny. Vialiki plus pačatku asnoŭnych kancertaŭ paśla abiedu ŭ tym, što jość čas pahladzieć na Budapiešt.
«NN»: Piatnaccać scen — heta šmat. Ci nie pieraškadžaje adzin kancert inšamu?
VR: Vyspa nastolki vialikaja, što ja letaś tolki pałovu jaje abyšoŭ. Prablemy časam byli z tym, što elektronnaja muzyka pierabivała etna-muzyku. Ale heta redka.
«NN»: Jakija dakumienty patrebnyja dla atrymańnia vienhierskaj vizy?
VR: Akramia asnoŭnych dakumientaŭ treba mieć kvitok na fiestyval. Voś i ŭsio.
«NN»: A dzie ŭ Minsku možna nabyć kvitki?
VR: Ciapier idzie prodaž u Internecie, a taksama praz turystyčnuju firmu «Restmarkiet», jakaja ładzić aŭtobusny tur na fest. Treba śpiašacca, bo 30 krasavika košty vyrastuć na 30 jeŭra. Dalejšaha rostu, praŭda, nie budzie.
Nabyć kvitki možna i na samim fiestyvali. Prablemy z hetym niama. Letaś na feście było kala 320 tysiač čałaviek, ale miesca ŭsim chapiła.
«NN»: Čamu vizy nie zrabili biaspłatnymi, jak na Be2gether?
VR: Była sproba damovicca z arhanizatarami fiestyvalu nakont biaspłatnych viz. Ale heta całkam kamiercyjny fiestyval. I arhanizatary nijakaha dačynieńnia da vizavych pytańniaŭ nie majuć. Sioleta pieršy hod, kali idzie šyrokaja papularyzacyja Sziget u Biełarusi. I kali ŭ hetym hodzie ŭsio projdzie dobra, to nie vyklučana, što arhanizatary na nastupny hod pasprabujuć z pasolstvam Vienhryi ŭ Biełarusi damovicca pa vizavym pytańni.
«NN»: Na jakija praktyčnyja momanty źviarnuli b uvahu?
VR: Pobač z vyspaj znachodzicca supiermarkiet, u jakim možna nabyć što zaŭhodna. Možna navat jechać biez namiota, prydbajecie na miescy. Dla hledačoŭ na vyśpie zrobleny dušy, prybiralni. Šmat kropak z vuhorskaj niedarahoj ježaj. Nieabaviazkova z saboj vieźci šmat rečaŭ. Źviarnu ŭvahu, što na vyspu nielha pryvozić ałkaholnyja napoi. Heta zroblena z-za taho, što siarod arhanizataraŭ festu — vytvorcy ałkaholu.
«NN»: Da festu jašče čatyry miesiacy. Ci jość užo žadajučyja patrapić na Sziget?
VR: Tak. Niekatoryja ŭžo vykazali žadańnie jechać aŭtobusami, jakija budzie śpiecyjalna arhanizoŭvacca na fiestyval ź Minska, inšyja pajeduć asobna. Kamuści zdajecca, što kvitki na Sziget darahija. Ale kali ŭličyć, kolki tam vystupić papularnych muzykaŭ, jakich u Biełarusi mo nikoli i nie pabačycie, to heta zusim niadoraha.
