Jość cudoŭnaja mahčymaść atrymać zadavalnieńnie ad jakasnaj biełaruskaj muzyki, i ŭvadnačaśsie mocna dapamahčy tym, chto maje patrebu i čakaje ludskoj dapamohi — chvorym dzieciam. Havorka idzie pra dabračynny kancert «Dobry fest», jaki adbudziecca ŭ Minsku 22 krasavika, z udziełam hurtoŭ IQ48, Neuro Dubel, «Pałac», srodki ad jakoha pojduć na padtrymku dziaciej-invalidaŭ Červienskaha doma-internatu.
«U pryncypie, dobra było b, kab takija kancerty prachodzili raz na tydzień, — kaža lider hurtu Neuro Dubel Alaksandr Kulinkovič. — Kročyš pa vulicy i bačyš abviestku: «Źbirajem hrošy na dziciačy dom» — čałaviek pojdzie dalej, zredku spynicca. U inšym vypadku čałaviek prychodzić na dabračynny kancert… Zapłaciŭ za kvitok, papiŭ piva, pasłuchaŭ muzyku, pakaŭbasiŭsia, paskokaŭ, adpačyŭ i tym samym dapamoh ludziam».
Z Kulinkovičam pahadžajecca Nina Šydłoŭskaja, kaardynatarka hramadskaj inicyjatyvy «Budźma biełarusami!»: «Ja vieru, što šmat chto padzialaje našaje mierkavańnie: być biełarusam — heta nie tolki hanarycca svajoj krainaj, kulturaj, historyjaj, heta jašče być adkaznym za tych, kamu patrebna dapamoha».
Akramia kancertu, u jakim možna budzie pabačyć i pačuć adrazu niekalki viadomych kalektyvaŭ roznych muzyčnych napramkaŭ, na «Dobrym feście» kožny hladač zmoža vykarystać mahčymaść i zrabić padarunki dzieciam: prynieści cacki, farby, albomy dla malavańnia dy inšyja patrebnyja dla dziaciej rečy.
Takim čynam, 22 krasavika, Kłub «Reaktar» (vuł. Charužaj, 29). «Dobry fest». Udzielniki: hurty IQ48, Neuro Dubel, B:N, ZM99 (Źmiaja) i Aleh Chamienka (hurt «Pałac»). Pačatak a 19.
Košt uvachodu: 20000 (tancplac zahadździa), 30000 (tancplac u dzień kanciertu), 40 000 (stolik).
