19 krasavika kala budynka pasolstva Biełarusi ŭ Kyrhyzstanie prajšli pikiety. Pavodle infarmacyi miascovych ŚMI, ich udzielniki patrabavali ad biełaruskich uładaŭ nie prymać Kurmanbieka Bakijeva i ŭ vypadku jaho prybyćcia na terytoryju Biełarusi — vydać novym uładam Kyrhyzstana.
Načalnik upraŭleńnia infarmacyi — pres-sakratar Ministerstva zamiežnych spraŭ Biełarusi Andrej Savinych paćvierdziŭ BiełaPAN infarmacyju ab praviadzieńni pikietaŭ. «Było niekalki pikietaŭ kala biełaruskaha pasolstva ŭ Biškieku. Jany byli karotkačasovyja i niebiaśpieki dla supracoŭnikaŭ pasolstva nie ŭjaŭlali», — skazaŭ pres-sakratar MZS.
Razam z tym, jon nie staŭ kamientavać mety praviadzieńnia akcyj.
Savinych taksama zajaviŭ, što MZS Biełarusi «nie maje nijakaj infarmacyi ab prylocie Bakijeva ŭ Minsk».
Siońnia na bryfinhu ŭ Astanie aficyjny pradstaŭnik MZS Kazachstana Askar Abdrachmanaŭ paviedamiŭ, što Kurmanbiek Bakijeŭ, jaki niekalki dzion znachodziŭsia na terytoryi Kazachstana, pakinuŭ krainu. Kudy mienavita nakiravaŭsia były lider Kyrhyzstana, nieviadoma.
Čutki pra toje, što Bakijeŭ vylecieŭ z Kazachstana i moža znachodzicca ŭ Biełarusi, aktyŭna musiravalisia 16—17 krasavika. Tady aficyjny Minsk abvierh hetuju infarmacyju.
18 krasavika Alaksandr Łukašenka zajaviŭ pra hatoŭnaść pryniać Kurmanbieka Bakijeva ź siamjoj u Biełarusi.
«Kali prezidentu Kyrhyzstana patrebna budzie padtrymka ŭ hetuju ciažkuju chvilinu dla jaho siamji <...>, jana budzie akazana ŭsialakaja ŭ Biełarusi. Kali jon zachoča pryjechać u Biełaruś — choć siońnia, choć zaŭtra, choć paślazaŭtra — my hatovy pryniać jaho tut. Ja viedaju, što ciapier uzdymiecca vyćcio va ŭsich srodkach masavaj infarmacyi, ale ja paŭtaraju — heta majo asabistaje rašeńnie jak kiraŭnika dziaržavy. Ja maju prava na hetaje rašeńnie. Niachaj mianie asudžajuć, nie asudžajuć, ale zdradžvać ludziam — heta samaje haniebnaje, što moža być u hetym śviecie», — zajaviŭ Łukašenka žurnalistam padčas naviedvańnia kaścioła Najśviaciejšaj Panny Maryi ŭ Minsku.
Miž tym, 17 krasavika namieśnik staršyni ŭrada Kyrhyzstana Azimbiek Bieknazaraŭ zajaviŭ: novyja ŭłady Kyrhyzstana buduć mieć «surjoznyja pytańni» da luboj z krain SND, jakaja daść prystanišča Kurmanbieku Bakijevu. Na pytańnie pra vierahodnaść znachodžańnia Bakijeva ŭ Minsku Bieknazaraŭ adkazaŭ, što «Łukašenka nie pojdzie na heta», bo pamiž Biełaruśsiu i Kyrhyzstanam «isnuje pahadnieńnie ab ekstradycyi złačyncaŭ». Bieknazaraŭ nahadaŭ, što ŭ dačynieńni da Bakijeva raspačata kryminalnaja sprava «pa faktach masavych zabojstvaŭ i uzurpacyi ŭłady».
