U Biełarusi stvorana hramadskaje abjadnańnie «Sajuz «Hildyja pivavaraŭ». Pra heta paviedamiŭ na pres‑kanfierencyi 27 krasavika ŭ Minsku staršynia savieta hildyi, hienieralny dyrektar AAT «Krynica» Ryhor Piatkievič.
U sajuz uvajšli
AAT «Krynica», AAT «Piŭzavod «Alivaryja», AAT «Lidskaje piva», kampanija Heineken u Biełarusi (ZZAT «Pivavarnaja kampanija «Siabar», SAAT «Rečycapiva»), AAT «Bresckaje piva».
Piatkievič adznačyŭ, što «ideja stvareńnia hildyi naśpiavała daŭno, ale jana była sfarmiravana, kali byli vyznačany asnoŭnyja hulcy rynku». Hildyja płanuje adstojvać intaresy ajčynnych vytvorcaŭ piva. Dadatkovym stymułam da stvareńnia sajuza pivavaraŭ stała, pavodle słoŭ Piatkieviča, «nieadnaznačnaje staŭleńnie da piva z boku dziaržavy, pryraŭnavańnie piva da ałkaholnych napojaŭ, źnižeńnie imidžu naturalnaści praduktu, nacisk na piŭnuju halinu, abmiežavalnyja i zabaronnyja miery, akcyznaja palityka, rost impartu piva».
«My abjadnalisia nie suprać kahości, my — za piva», — padkreśliŭ vykanaŭčy dyrektar hildyi Saŭlus Haładaŭskas.
Jon adznačyŭ, što hildyja budzie imknucca «ŭźniać reputacyju biełaruskaha piva da ŭzroŭniu nacyjanalnaha honaru». «Misija hildyi — zachoŭvać najlepšyja biełaruskija tradycyi pivavarstva, pryvieści ich u adpaviednaść z vyšejšymi mižnarodnymi standartami i pieradać ich nastupnym pakaleńniam», — skazaŭ Haładaŭskas.
Pavodle jaho słoŭ, «u Biełarusi kultura spažyvańnia ałkaholu vielmi niezdarovaja ŭ paraŭnańni z susiednimi krainami i krainami Jeŭropy — na praciahu šerahu hadoŭ pieravažaje spažyvańnie harełki i macavanych vin». Pavodle źviestak kancerna «Biełdziaržcharčpram», spažyvańnie piva ŭ 2009 hodzie ŭ absalutnym ałkaholi skłała 2,3 litra na dušu nasielnictva, vina vinahradnaha — 0,4 litra, viny pładovaha — 3,4 litra, mocnych śpirtnych napojaŭ — 5,4 litra. «Kali ničoha nie rabić, to moža adbycca dalejšaje pavieličeńnie akcyznaha padatku (u 2010 hodzie akcyz na piva pavialičany na 54%, na harełku — na 9%), roznaha rodu abmiežavańniaŭ — na rekłamu, miesca i čas prodažu, impart budzie i dalej vyciaśniać ajčynnaje piva, spažyŭcy i dalej buduć addavać pieravahu pładova‑iahadnamu bolš, čym pivu», — ličyć vykanaŭčy dyrektar hildyi.
Jon adznačyŭ, što sajuz pivavaraŭ budzie nieści i aśvietnuju misiju. Tak, płanujecca stvaryć «piŭnuju akademiju».
Haładaŭskas paviedamiŭ, što «hildyja adkryta dla pryjomu lubych pradpryjemstvaŭ haliny ŭ Biełarusi, u tym liku soładavych».
Siońnia dyrektary pradpryjemstvaŭ — členy hildyi padpisali Kodeks honaru pivavaraŭ.
