«Urad Biełarusi nieapraŭdana zamaroziŭ zarobki rabotnikaŭ biudžetnaj śfiery, asabliva piedahohaŭ i miedycynskich rabotnikaŭ», — ab hetym havorycca ŭ rezalucyi ŭdzielnikaŭ mitynhu Fiederacyi prafsajuzaŭ Biełarusi (FPB), jaki prajšoŭ 1 maja ŭ Minsku kala Nacyjanalnaj biblijateki.U mitynhu, pa roznych acenkach, uziało ŭdzieł ad 15 da 30 tys. čałaviek.
Rezalucyju abviaściŭ staršynia Minskaha haradskoha abjadnańnia FPB Mikałaj Biełanoŭski. U dakumiencie padkreślivajecca, što miery pa strymlivańni rostu zarobkaŭ biudžetnikaŭ «viaduć da razareńnia hetych ludziej i ich siemjaŭ». Urad Biełarusi «drenna vykonvaje» ŭkazańni prezidenta, ličać udzielniki mitynhu. Jon pavinien pravodzić «bolš dziejsnuju i aktyŭnuju» pracu pa paskareńniu tempaŭ raźvićcia ekanomiki, pieraadoleńni niehatyŭnych nastupstvaŭ suśvietnaha finansavaha kryzisu, stvareńni novych pracoŭnych miescaŭ, pavyšeńni dachodaŭ nasielnictva i dabrabytu hramadzian krainy. Udzielniki mitynhu taksama zapatrabavali, kab urad, vyrašajučy pytańni prodažu pradpryjemstvaŭ pryvatnym inviestaram, zakanadaŭča zamacavaŭ u damovach normy ab zachavańni pracoŭnych kalektyvaŭ i prafsajuznaj arhanizacyi.
U rezalucyi taksama adznačajecca, što ŭsie sacyjalnyja partniory ŭ hety składany pieryjad pavinny prajaŭlać sacyjalnuju adkaznaść, zabiaśpiečyć vykanańnie ŭ poŭnym abjomie pryniatych u pahadnieńniach i kalektyŭnych damovach abaviazacielstvaŭ pa pavyšeńni ŭzroŭniu žyćcia i sacyjalnaj abaronie rabotnikaŭ.
Mitynhoŭcy padtrymali pravodzimy Alaksandram Łukašenkam kurs «na pabudovu sacyjalna aryjentavanaj dziaržavy, jakaja zabiaśpiečvaje roŭnyja i šyrokija mahčymaści ŭsim hramadzianam našaj krainy, zachavańnie niezaležnaści i suvierenitetu Biełarusi».Pradstaŭniki FPB adznačyli, što Biełarusi «udałosia supraćstajać i pieraadoleć niehatyŭnyja nastupstvy suśvietnaha finansavaha kryzisu». Jany zajavili ab važnaj roli FPB va udaskanaleńni dziaržaŭnaj ekanamičnaj palityki, zachavańni dziejučych i stvareńni novych pracoŭnych miescaŭ, pavyšeńnie ŭzroŭniu žyćcia ludziej. Udzielniki mitynhu zaklikali ŭsich žycharoŭ krainy razam z FPB «zmahacca suprać biurakratyi za ekanamična mocnuju i kvitniejučuju Biełaruś».
