Pieramožcaj nacyjanalnaha konkursu pryhažości stała Ludmiła Jakimovič z Hrodna.
Pieramožcaj siomaha nacyjanalnaha konkursu pryhažości «Mis Biełaruś-2010», jaki prajšoŭ 30 krasavika ŭ minskim Pałacy sportu, stała 22-hadovaja Ludmiła Jakimovič z Hrodna.
Padčas uručeńnia pieršaj «stužački» Ludmiła nie strymała śloz.
U žury konkursu siadzieli ministr kultury Pavieł Łatuška, rasiejski śpiavak Siarhiej Łazaraŭ, frystajlist Alaksiej Hryšyn, kiraŭnik prezidenckaha arkiestra Viktar Babarykin, akcior Raścisłaŭ Jankoŭski, šviedski pijanist Robiert Uełłs… Siarod hledačoŭ možna było razhledzieć Aleha Pralaskoŭskaha, Natallu Piatkievič, Inu Afanaśjevu, Anatola Jarmolenku, Vasila Rainčyka i, viadoma, Alaksandra Łukašenku. Kiraŭnik dziaržavy siadzieŭ u atačeńni samych pryhožych biełaruskich pryhažuń — pieršaj vice-mis«Interkantyniental-2009» Maryi Jeśman i madeli Julii Sindziejevaj.
Pieramahła ŭ konkursie 22-hadovaja Ludmiła Jakimovič z Hrodna. Jana ŭziała i tytuł «Mis Fota». Atrymlivajučy pieršuju stužačku, Ludmiła navat papłakała. A kali ŭskładali karonu pieramožcy, taksama chacieła zapłakać, ale strymałasia.
«Samy zapaminalny momant u maim žyćci — heta śviata žyćcia. Ja bajałasia, što ŭžo nie apynusia na hetym miescy», — pryznałasia pryhažunia.
Rost Ludmiły — 172 sm., paramietry — 83-59-89. Jana vučycca na 5 kursie Biełaruskaha instytuta pravaznaŭstva pa śpiecyjalnaści «jurydyčnaja psichałohija». Na kastynh «Mis Biełaruś» pryjšła pa radzie siabroŭki — raniej da madelnaj dziejnaści nie mieła dačynieńnia. Ludmiła niekali surjozna zajmałasia płavańniem, naviedvaje trenažornuju zału.
Razam ź pierachodziačym pryzam — karonaj, vyrablenaj z vykarystańniem 100 hramaŭ biełaha zołata 585-j proby i kala paŭtysiačy kaštoŭnych i paŭkaštoŭnych kamianioŭ — Jakimovič atrymała 50 młn. rubloŭ, prava pradstaŭlać krainu na konkursie pryhažości «Mis śvietu» i tradycyjny bukiet ad kiraŭnika dziaržavy.
Tytuł «Pieršaj vice-mis» i 20 młn. rubloŭ dastalisia 21-hadovaj Hańnie Kindruk ź Pinska.
Zvańnie «Druhi vice-mis» i 10 młn. rubloŭ atrymała 20-hadovaja Anastasija Charłanova z Homiela.
