Pierad kancertam u kłubie «Reaktar» hutarka z repieram.
7 maja ŭ kłubie «Reaktar» maje być vialiki kancert adnaho ź lideraŭ biełaruskaha repu em-si Vinsent'a. U hety viečar śpiavak vykanaje svaje najlepšyja pieśni. Adnak heta budzie nie solny vystup, a ceły fest biełmoŭnaha repu. U konadzień kancertu pra tvorčaść i pra biełaruski rep hutarka z Vinsent'am.
«NN»: Vaš klip «Vosieński vals» trapiŭ u lik 5 najlepšych klipaŭ zimy pavodle telekanała ANT. Jak tak vas takoha niefarmatnaha ŭziali na televiziju?
V: Kali ščyra sam nie čakaŭ. Mianie pakazali ŭ błoku biełaruskamoŭnych klipaŭ, razam z klipami Irynaj Darafiejevaj i J-morsam. Ale pakolki było interaktyŭnaje hałasavańnie, dyk ludzi pačali padtrymlivać mianie svaimi hałasami, i ŭ vyniku ja trapiŭ u piaciorku najlepšych. Ciapier kruciać klip dosyć rehularna, ludzi pačali paznavać na vulicach.
«NN»: Rep i patryjatyčnaja pieśnia (majem na ŭvazie vaš trek «Słava hierojam», pryśviečany Kastusiu Kalinoŭskamu)… Spałučajecie niespałučalnaje?
V: Kalinoŭski viadoma hieroj, ale jak čałaviek poŭny supiarečnaściaŭ, i tamu ja vyrašyŭ pieraapracavać jaho vobraz na śvij manier. U čymści davieryŭsia Karatkieviču. Pieršyja słupki pieśni - majo asabistaje pračytańnie lista Alesia Zahorskaha, hałoŭnaha hieroja ramana «Kałasy pad siarpom tvaim», jak jon z Mahilova piša Kastusiu Kalinoŭskamu, što znachodzicca ŭ Sankt-Pieciarburhu. A apošni słupok — čysta maje ŭražańni, (apisanaje padaražža z sučasnaha Minsku ŭ Vilniu-kares.), maje razvahi pra volu, pra toje, što za sto piaćdziesiat hadoŭ faktyčna ničoha nie źmianiłasia.
«NN»: Adnak na telebačańnie vy patrapili ź liryčnaj «Vosieński vals»…
V: Ja nie padzialaju svaju tvorčaść — usie pieśni napisanyja ad ščyraha serca: i liryčnaja «Vosieński vals» i patryjatyčnaja «Słava hierojam». Prosta zrazumieła, što druhuju pieśniu naŭrad ci puściać u efir. Ale ž ludzi, pahladzieŭšy liryčnuju pieśniu , zajšli ŭ Sieciva i spampavali siarod inšych i «Słava hierojam». A liryčnaja pieśnia — heta jašče i šaniec trapić na ekran.
«NN»: Ciapier prablem z vystupami niama?
V: Nie, aby zaprašali. Voś bačycie — vystupajem u samym vialikim kłubie Minsku. Situacyja z vystupami značna palepšyłasia, ciapier nie toje što było kolki hadoŭ tamu. U stalicy dyk uvohule nijakich prablemaŭ, kali chto nadta žorstka vykonvaje svaje abaviazki dyk heta ŭ pravincyi. Kali pryjazdžajuć alternatyŭnyja muzyki, dyk rabotnikaŭ rajvykankamaŭ prosta šok: «A što hetyja muzyki vykinuć? A što nam skažuć u Minsku?».
Takim paradkam, 7 maja. Kłub «Reaktar» (Charužaj 27). Kancert biełaruskamoŭnaha repiera Vinsent'a i tych, chto robić padobnuju muzyku — Lunclan, PANaNieba i Vožyka.
Košt kvitkoŭ: 15 000 (papiarednie), 20 000 (u dzień kancertu na ŭvachodzie), 25 000 (miesca za stolikam). Padčas festu buduć praviedzieny konkurs na najlepšaha rep-čytalnika ź liku hledačoŭ (treba budzie zympravizavać niekalki radkoŭ) b pieramožcu čakajuć pryzy. Padčas kancertu taksama adbudziecca zapis videaklipa.
Hladzieć jašče: klip «Vosieński vals»:
