Konkursny etap fiestyvalu biełaruskamoŭnaj rekłamy i pramoŭšena «Adnak!» startavaŭ u Minsku. Ideja fiestyvalu naležyć ahulnanacyjanalnaj kulturnaj kampanii «Budźma biełarusami!». Arhanizacyjnym partnioram fiestyvalu vystupiŭ śpiecyjalizavany interniet‑resurs www.marketing.by.
Jak paviedamiła 13 maja na pres‑kanfierencyi kaardynatar kampanii «Budźma biełarusami!» Alena Makoŭskaja, biełaruskamoŭnaja rekłama pavinna być bolš zapatrabavanaj, u pieršuju čarhu ŭ asiarodździ samich vytvorcaŭ i zakazčykaŭ rekłamy. «Letaś sumiesna z aksijamietryčnaj łabaratoryjaj «NOVAK» i Biełaruskim instytutam stratehičnych daśledavańniaŭ (Litva) my praviali sacyjałahičnaje apytańnie, vyniki jakoha karysnyja našym rekłamistam. 70% apytanych chacieli b bačyć rekłamu ź biełaruskim kantekstam: z vykarystańniem biełaruskich simvałaŭ, historyi, kultury. 40% chacieli b bačyć rekłamu na biełaruskaj movie. Na žal, naša rekłamnaja industryja pakul nie daje takoj mahčymaści», — zajaviła Makoŭskaja.
Pavodle jaje słoŭ, «rekłama — heta častka infarmacyjnaha pola». «Praviadzieńnie takoha fiestyvalu — adkaz na zapyty hramadstva», — adznačyła Makoŭskaja.
Kiraŭnik resursu marketing.by Siarhiej Skarachod paviedamiŭ, što meta fiestyvalu — sabrać usie rekłamnyja raboty, zroblenyja na biełaruskaj movie za apošnija try hady. «My nie stavili žorstkich umoŭ udziełu ŭ fiestyvalu, naprykład takich, jak na fiestyvali rekłamy «Bieły kvadrat». U adroźnieńnie ad «Kvadrata», udzieł u fiestyvali biaspłatny. Udzielnikami mohuć być usie: jak prafiesijnyja hulcy rekłamnaha rynku, tak i fryłansiery, piersanalnyja aŭtary, hramadskija abjadnańni», — skazaŭ Skarachod.
Pavodle jaho słoŭ, skład žury jašče nie sfarmiravany, adnak u jaho ŭvojduć nie tolki śpiecyjalisty ŭ halinie rekłamy, ale i pradstaŭniki inšych prafiesij: režysiory, dyzajniery, interniet‑dyzajniery i inš. Žury ŭ kožnaj katehoryi budzie samastojna vybirać kryteryi, pa jakich budzie sudzić raboty, adznačyŭ Skarachod.
U ramkach fiestyvalu praduhledžana niekalki naminacyj. Heta televizijnaja i kinarekłama, drukavanaja i źniešniaja rekłama, dyzajn (paštoŭki, kalendary, buklety, łahatypy, firmienny styl), interniet‑rekłama (baniery, proma‑sajty, interaktyŭnyja prajekty), radyjo‑ abo aŭdyjorekłama.
Usie pieramožcy atrymajuć u jakaści pryza statuetki i dypłomy.
