Minsk, Brest, Homiel, Hrodna, Mahiloŭ, Barysaŭ, Žodzina, Słonim, Viciebsk, Słuck, Salihorsk, Babrujsk, Vaŭkavysk… 18 maja milicyja praviała pieratrusy ŭ dziesiatkaŭ aktyvistaŭ kampanii «Havary praŭdu». Telefony lidera kampanii Uładzimira Niaklajeva i inšych aktyvistaŭ nie adkazvajuć. Heta pieršy vypadak takoha ahulnanacyjanalnaha nalotu ad 2008 hoda, kali anałahičnym čynam zapałochvali telekanał «Biełsat».
Kab vynieści z ofisu rečy i arhtechniku, da padjezdu padahnali 3 mikraaŭtobusy.
Z ofisu "Havary praŭdu" paśla pieratrusu vynosiać rečy.
Žurnalistaŭ adciaśnili ź miesca padziejaŭ.
Takoj skaardynavanaj akcyi śpiecsłužbaŭ suprać niezaležnaha hramadstva daŭno nie było. Adrazu pa abiedzie pryjšła viestka pra pieratrus na centralnym ofisie kampanii ŭ Minsku. Paśla padobnyja viestki pryjšli z Bresta, Homiela, Hrodna, Barysava, Vaŭkavyska i inšych haradoŭ. U siłavikoŭ adnaznačna była padrabiaznaja infarmacyja pra ŭsie štaby kampanii, a taksama pra jaje aktyvistaŭ.
Najbolš viadomych kaardynataraŭ «Havary praŭdu» paśla zatrymańniaŭ na ofisie vieźli dadomu, kab užo tam pravieści dadatkovy pieratrus. Tak było z redaktaram haziety «Tovariŝ» Siarhiejem Vaźniakom, ź mižnarodnym sakratarom Abjadnanaj hramadzianskaj partyi Andrejem Dźmitryjevym, žurnalistam Alaksandram Ulicionkam, palitołaham Śviatłanaj Navumavaj.
Da ekśpierta kampanii, publicysta Alaksandra Fiaduty milicyja taksama pryjšła dadomu. Šukali «rečy, zdabytyja złačynnym šlacham». «Ničoha, aproč mianie i dziesiaci tysiač knih u kvatery jany nie znajšli», — kaža A.Fiaduta.
Potym zatrymanych advozili ŭ Leninski RUUS, dzie ź imi pravodzilisia nievialikija dopyty. Kazali, što zaviedzienaja kryminalnaja sprava pa artykule 250 KK (raspaŭsiudžvańnie łžyvaj infarmacyi pra tavary i pasłuhi).
Pradprymalnik Viktar Harbačoŭ z Barysava skazaŭ nam, što cikavilisia ŭsim, što datyčyć kampanii «Havary praŭdu», ich drukavanaj pradukcyjaj.
Pieratrus z pahromam taksama prajšoŭ na ofisie sacyjałahičnaj łabaratoryi «Novak», jakuju ŭznačalvaje prafiesar Andrej Vardamacki. Tam adbyŭsia nievialiki kanflikt pamiž supracoŭnikam łabaratoryi i milicyjanieram.
Siarod inšaha, kanfiskavany «Čarnobylski zvon», jaki tradycyjna niasuć na vuličnaj akcyi 26 krasavika. Skulptar Aleś Šaternik nieaściarožna pakinuŭ jaho ŭ piśmieńnika Michasia Bašury, jaki taksama trapiŭ pad katok.
Na masavyja vobšuki j zatrymańni možna čakać aficyjnaj reakcyi z boku Brusela i asobnych krain ES.
A Rasija? Pa jaje reakcyi ci jaje adsutnaści možna budzie mierkavać, jakuju pazicyju Kreml źbirajecca zaniać padčas prezidenckich vybaraŭ.
* * *
onłajn
Adzin z dapytanych aktyvistaŭ kampanii «Havary praŭdu» Michaś Bašura paviedamiŭ, što padčas pieratrusu na adnym z ofisaŭ u Miensku
zabrali «Čarnobylski zvon».
Uładalnik zvonu Aleś Šaternik pakinuŭ jaho ŭ Michasia, kali źjaždžaŭ za miažu. Hety zvon zaŭsiody niasuć napieradzie «Čarnobylskaha šeścia». Niekalki razoŭ było, što milicyjanty zabirali zvon razam z hukaŭzmacnialnaj aparaturaj u arhanizataraŭ akcyi.
Ciapier jon budzie znachodzicca ŭ milicyi Leninskaha rajonu razam z kamputarami i drukavanaj pradukcyjaj, pieradaje Radyjo Svaboda.
***
U Leninski RUUS pryvieźli Siarhieja Vaźniaka i Mikitu Matusieviča. Idzie pieratrus u palitołaha EHU Śviatłany Navumavaj.
Pieratrus na kvatery ŭ Andreja Dźmitryjeva — mižnarodnaha sakratara AHP.
Pieratrus u palittechnołaha Alaksandra Fiaduty
Šukajuć rečy, «zdabytyja złačynnym šlacham».
U žurnalista Alaksandra Ulicionka pieratrus skončany, jaho pavieźli ŭ Leninski RUUS.
Adzin z zatrymanych Jury Alejnik paśla dopytu raspavioŭ, što padčas dopytu śledčy nie adkazała na pytańnie pa jakoj spravie jaho dapytvajuć u jakaści śviedki. Pa słovach Jurasia, na ofisie milicyjanty ŭvieś čas paŭtarali, što pieratrus prachodzić u ramkach kryminalnaj spravy,
zaviedzienaj pa 250 artykule KK RB (raspaŭsiud iłžyvaj infarmacyi pra tavary i pasłuhi). Na dopycie śledčy raspytvała, jakoje dačynieńnie Juraś Alejnik maje da kampanii «Havary praŭdu», što viedaje pra publikacyju drukavanych materyjałaŭ ci atrymlivaje hrošy ad kampanii.
Na dumku aktyvista, takim čynam ułady chočuć spynić dziejnaść kampanii, zapałochać jaje ŭdzielnikaŭ, a taksama pieraškodzić udała startavanaj akcyi pa pierajmienavańniu vulicy Ŭljanaŭskaja ŭ vulicu Vasila Bykava.
Jak raspavioŭ Svabodzie adzin z zatrymanych u ofisie kampanii «Havary praŭdu» paśla taho jak jaho dapytaŭ major milicyi, zaraz u Leninskim RUUSie kala 20 aktyvistaŭ kampanii.
Pa roznych kabinietach ich apytvajuć u ramkach kryminalnaj spravy pra dziejnaść ad imia kampanii «Havary praŭdu»: dzie drukujuć ulotki, jakija mierapryjemstvy płanujuć.
Uładzimir Niaklajeŭ znachodzicca ŭ ofisie.
Alaksandra Ulicionka, a taksama jašče čatyroch čałaviek, zabrali z ofisu i pavieźli rabić pieratrus dadomu.
Usiaho z ofisu ŭ RUUS było dastaŭlena 11 čałaviek, astatnich pryvozili ź inšych miescaŭ.
Pieratrus u Vaŭkavysku
Adbyvajecca zaraz u siabry AHP Vitala Hulaka. Pa telefonie jon tolki skazaŭ, što jaho pravodziać milicyjanty z Horadni. Što šukajuć i čaho chočuć milicyjanty Vital Hulak, ź jaho słoŭ, tak i nie zrazumieŭ. Praŭda, skazaŭ, što kamputar kanfiskoŭvajuć. Pieratrus pakul praciahvajecca, paviedamlaje Radyjo Svaboda.
***
Hrodna: pieratrusy ŭ aktyvistaŭ AHP
Pieratrusy adbylisia na kvaterach u namieśnicy staršyni haradskoj arhanizacyi AHP Alaksandry Vasilevič i moładzievaha aktyvista partyi Źmitra Bandarčuka.
Sa słoŭ Alaksandry Vasilevič, pieratrus rabili na padstavie ordera vydadzienaha Leninskim RAUS h. Minska ŭ jakim było zapisana, što ŭ kvatery mohuć znachodzicca materyjały, jakija majuć adnosiny da spravy.
Ale da jakoj spravy, sa słoŭ Alaksandry Vasilevič, tam ničoha zapisana nie było i ab hetym joj ničoha nie patłumačyli. Spadarynia Vasilevič kaža, što šukali niejkija dakumienty, a kanfiskavali noŭtbuk, telefon mabilny, pryntar, fłeški, dakumienty AHP — ulikovyja kartki maładych demakrataŭ.
Śledčych taksama cikaviła, što Alaksandra Vasilevič viedaje pra ruchi «Havary praŭdu!» i «Napierad». Ź jaje słoŭ, pytańni zadavali z papierki, dzie jany byli zaranioŭ zapisanyja.
Telefon Źmitra Bandarčuka dahetul nie adkazvaje.
15:11
Vyvieli z ofisa aktyvistku kampanii Ninu Pachopku, pahruzili ŭ mašynu i pavieźli na jaje kvateru pravodzić pieratrus. Nina Pachopka paćvierdziła, što ŭ ofisie znachodzicca Uładzimir Niaklajeŭ.
Nina pryjechała niekalki hadzin tamu na zvanok ab pieratrusie Uładzimira Niaklajeva, zajšła ŭ ofis i adtul užo nie vyjšła.
14:54
Pryjechali čatyry śpiecnazaŭcy ŭ «kaściumach kasmanataŭtaŭ», jany pačynajuć adciskać žurnalistaŭ. Taksama zanosiać u ofis pustyja skryni. Buduć hruzić arhtechniku.
Pa niepaćvierdžanaj infarmacyi pieratrus adbyvajecca ŭ ofisie sacyjałahičnaj łabaratoryi NOVAK. Telefon kiraŭnika arhanizacyi Andreja Vardamackaha nie adkazvaje, dadaje Radyjo Svaboda.
Karespandent Svabody zaraz znachodzicca ŭ Mahilovie na vulicy Leninskaj kala doma № 27. U hetym domie znachodzicca ofis dabračynnaha fondu «Ščyraść». Uvachod u pamiaškańnie ofisu achoŭvajuć dvoje dužych u cyvilnym chłopcaŭ. Karespandenta tudy nie prapuścili, skazali, što viadziecca pieratrus. Taksama patłumačyli, što ŭžo vyznačanaje koła ludziej, jakija majuć prava prysutničać padčas pieratrusu.
Kolki praciahniecca pieratrus, nie skazali, ale dali zrazumieć, što doŭha.
14:32
Vyjšaŭ milicyjanier i skazaŭ, što ŭ ofisie śledčaja hrupa pravodzić ekśpierymient. Bolš ničoha nie viadoma.
U Tvitery na pravda_by paviedamlajecca, što ciapier usie zatrymanyja znachodziacca ŭ Leninskim RUUS.
14:21
Tak, u minskim ofisie byŭ zatrymany hałoŭny redaktar haziety «Tovariŝ» Siarhiej Vaźniak.
Telefony lidera kampanii Uładzimira Niaklajeva i inšych aktyvistaŭ nie adkazvajuć. Pavodle našaj infarmacyi, u minskim ofisie znachodzicca Niaklajeŭ. Ale žurnalistaŭ u ofis nie puskajuć nieviadomyja. Tady žurnalisty vyklikali milicyju, pryjechali dvoje supracoŭnikaŭ, adzin ź ich zajšoŭ u ofis. Karespandentaŭ
* * *
Pieratrusy taksama prachodziać u Mahilovie, Breście, Hrodnie (kvatera Ihara Łamieki), Barysavie.
* * *
U Homieli trasuć adrazu ŭ niekalkich miescach, u tym liku ŭ kvatery aktyvista Juryja Varoniežcava.
Varoniežcaŭ paśpieŭ paviedamić BiełaPAN, što da jaho pryjechali supracoŭniki milicyi i patrabujuć puścić ich u kvateru. Paśla hetaha suviaź z aktyvistam abarvałasia, jaho mabilny telefon zaraz adklučany.
Da doma vučonaha pryjechała niekalki žurnalistaŭ. Zaraz kala kvatery dziažuryć supracoŭnik milicyi, jaki nikoha nie puskaje ŭnutr i tłumačyć heta tym, što ŭ kvatery pravodziacca śledčyja dziejańni. Adnak z čym źviazanyja hetyja dziejańni, jon nie paviedamlaje.
