Prahrama «Vybar» (viadučy — Siarhiej Darafiejeŭ), pryśviečanaja budaŭnictvu atamnaj elektrastancyi ŭ Astravieckim rajonie, była pakazanaja na kanale ANT viečaram 17 maja.
Na sajcie ANT u archivie pakul heta pieradača nie źjaviłasia.
Kali ŭ studyi byŭ prykładny parytet siarod udzielnikaŭ dyskusii, to 87% telehledačoŭ, što pazvanili ŭ efir, zajavili, što nie vierać u biaśpieku sučasnych AES.
Udzieł u pieradačy ŭziali pradstaŭniki Aakademii navuk, Minenierha, Minpryrody, ekołahi, pradstaŭniki hramadskaści.
Tak, apanienty budaŭnictva AES rasijski ekołah Andrej Ažaroŭski i staršynia rady HA «Ekadom» Iryna Suchij źviarnuli ŭvahu na toje, što prapanavanyja da realizacyi ŭ Biełarusi rašeńni «u mietale nidzie nie ŭvasoblenyja», nazyvajučy prajekt budučaj AES‑2006 «ekśpierymientalnym». «Havorka idzie pra reaktar VVR‑1200,
takoha reaktara nidzie niama», — padkreśliŭ A.Ažaroŭski,zaznačaje Interfaks.
Brali ŭdzieł u dyskusii viadomyja navukoŭcy Ivan Nikitčanka i Hieorhi Lepin, jakija taksama vystupali suprać AES. Byŭ taksama pakazany dosyć uzvažany siužet z Astravieckaha rajona, dzie dali słova jak starońnikam AES, tak i krajaznaŭcam, zakłapočanym pierśpiektyvaj źniščeńnia ŭnikalnaha histaryčnaha łandšaftu Astravieččyny, tak i ludziam, jakija kłapociacca pra zdaroŭje svaich dziaciej.
SMS‑čat taksama byŭ zbolšaha ŭ nastupnym rečyščy: navošta nam hetaja AES — zdaroŭje važniej.
«Havorka idzie pra toje, što siudy choča pryjści mahutnaja karparacyja z majoj krainy (Ažaroŭski - hramadzianin Rasi) — Rasatam, jakaja vałodaje nievyčerpnymi dziaržaŭnymi resursami, jakaja hatovaja pierakanać lehkaviernych ludziej, što niama roźnicy, jaki reaktar. Jana prapichvaje svoj prajekt.
Zadajcie pytańnie, kamu vyhadnaje budaŭnictva AES u Biełarusi? Rasatamu», — cytuje słovy Ažaroŭskaha «Interfaks».