Prezident Biełarusi Alaksandr Łukašenka płanuje ŭ bližejšy čas naviedać z aficyjnym vizitam Azierbajdžan. Pra heta paviedamiŭ siońnia na pres‑kanfierencyi Nadzvyčajny i Paŭnamocny Pasoł Azierbajdžana ŭ Biełarusi Ali Tejmur ahły Nahijeŭ.
«Praź niekalki dzion adbudziecca aficyjny vizit Alaksandra Łukašenki ŭ Azierbajdžan», — skazaŭ pasoł.
Pavodle jaho słoŭ, vizit pavinien nadać značny impuls dalejšamu raźvićciu adnosin pamiž dźviuma krainami. Dypłamat pierakanany, što pamiž Biełaruśsiu i Azierbajdžanam va ŭsich śfierach — palitycy, ekanomicy, humanitarnym supracoŭnictvie — niama takich pytańniaŭ, jakija niemahčyma vyrašyć.
Havoračy ab majučym adbycca vizicie kiraŭnika biełaruskaj dziaržavy ŭ Azierbajdžan, Ali Tejmur ahły Nahijeŭ paviedamiŭ, što ŭ chodzie sustrečy lideraŭ dźviuch dziaržaŭ płanujecca abmierkavać šyrokaje koła pytańniaŭ. Pasoł nie vyklučyŭ, što prezidenty abmiarkujuć i supracoŭnictva ŭ enierhietyčnaj śfiery. Jon padkreśliŭ, što Azierbajdžan adkryty dla takoha supracoŭnictva i hatovy ŭdzielničać u roznych prajektach: «Nabuka», «Adesa — Brody» i inš. «Ale tyja dziaržavy, jakija zacikaŭleny ŭ hetym, pavinny zrabić svoj vybar», — adznačyŭ pasoł.
Što datyčycca mahčymaha supracoŭnictva Biełarusi i Azierbajdžana ŭ enierhietyčnaj śfiery, dypłamat paviedamiŭ, što śpiecyjalisty abodvuch bakoŭ heta pytańnie ŭžo abmiarkoŭvali. Z azierbajdžanskaha boku heta byli pradstaŭniki Minprama, Minekanomiki, Naftavaj karparacyi. «Tut nijakich pytańniaŭ niama. Treba pryjści da ahulnych padychodaŭ, jakija buduć ekanamična vyhadnyja abiedźvium krainam», — padkreśliŭ Ali Tejmur ahły Nahijeŭ.‑
