Rašeńnie ab nakiravańni biełaruskich vajskoŭcaŭ dla ŭdziełu ŭ siłavych apieracyjach Arhanizacyi Dahavora ab kalektyŭnaj biaśpiecy (ADKB) budzie prymać prezident. Pra heta paviedamiŭ žurnalistam ministr abarony Biełarusi Juryj Žadobin, kamientujučy ratyfikacyju Pałataj pradstaŭnikoŭ 26 maja pahadnieńnia ab Kalektyŭnych siłach apieratyŭnaha reahavańnia (KSAR) ADKB.
Pavodle jaho słoŭ, ad Biełarusi ŭ skład KSAR ADKB uvojduć złučeńni Uzbrojenych sił (amal 2.000 čałaviek), śpiecyjalny atrad chutkaha reahavańnia MUS (80 čałaviek), aficery śpiecpadraździaleńniaŭ KDB (30 čałaviek) i chutkaha reahavańnia MNS (30 čałaviek).
Jak adznačyŭ Žadobin, ratyfikacyja pahadnieńnia nie aznačaje, što ŭzbrojenyja siły Biełarusi «buduć nakiroŭvacca kali i kudy zachočacca».
«U kožnym asobnym vypadku budzie rychtavacca ŭkaz kiraŭnika dziaržavy. U im budzie kankretna prapisana, jak, kali i na jakich umovach našy ŭzbrojenyja siły buduć nakiroŭvacca za miažu», — skazaŭ ministr abarony.
Pahadnieńnie ab KSAR ADKB było padpisana Biełaruśsiu 15 kastryčnika 2009 hoda z metaj abjadnańnia namahańniaŭ dziaržaŭ — členaŭ ADKB dla supraćstajańnia ŭzbrojenamu napadu, u tym liku ahresii, i supraćdziejańnia inšym vyklikam i pahrozam. Z krain ADKB ad padpisańnia pahadnieńnia ŭstrymaŭsia Uźbiekistan.
U adpaviednaści z dakumientam baki stvarajuć Kalektyŭnyja siły apieratyŭnaha reahavańnia, jakija źjaŭlajucca kampanientam pastajannaj hatoŭnaści sił i srodkaŭ sistemy biaśpieki ADKB. Pry hetym KSAR nie mohuć prymianiacca dla vyrašeńnia sprečak pamiž bakami, jakija padpisali pahadnieńnie.
Rašeńnie ab składzie, terminach razvaročvańnia i prymianieńnia kantynhientu KSAR prymajecca Savietam kalektyŭnaj biaśpieki na padstavie aficyjnaha zvarotu adnaho ci niekalkich bakoŭ na asnovie kansensusu i zhody bakoŭ, dla jakich pahadnieńnie nabyło moc.
Varta adznačyć, što apošnim časam Alaksandr Łukašenka nieadnarazova vykazvaŭ sumnieńnie ŭ dziejazdolnaści i nieabchodnaści ADKB. Spačatku heta prahučała 20 krasavika, kali prezident adkazvaŭ na pytańni pa vynikach svajho pasłańnia biełaruskamu narodu i Nacyjanalnamu schodu. Zatym padobnuju zajavu jon zrabiŭ 25 krasavika, padčas hałasavańnia na miascovych vybarach.
Pavodle mierkavańnia Łukašenki, nieefiektyŭnaść ADKB vyjaviłasia ŭ suviazi z padziejami ŭ Kyrhyzstanie. Havorka idzie ab niežadańni Rasii, jakaja staršynstvuje ŭ hetaj struktury, zaniacca ŭrehulavańniem situacyi ŭ Kyrhyzstanie, jaki ŭvachodzić u ADKB, z vykarystańniem miechanizmaŭ, praduhledžanych jaje statutnymi dakumientami.
Nahadajem taksama, što letam 2009 hoda Łukašenka de‑fakta admoviŭsia padpisvać pahadnieńnie ab stvareńni KSAR, a taksama prymać na siabie staršynstva ŭ ADKB u adkaz na zabaronu pastavak małočnych praduktaŭ u Rasiju.
U ADKB uvachodziać Armienija, Biełaruś, Kazachstan, Kyrhyzstan, Rasija, Tadžykistan i Uźbiekistan.
