Jak paviedamiła načalnik adździaleńnia ahitacyi i prapahandy abłasnoj DAI Natalla Sacharčuk, avaryi zdarylisia 26 maja na aŭtadarozie za adzin kiłamietr ad vioski Lasnaja.
Padčas pieršaj, što adbyłasia ŭ 6.45, 33‑hadovy hramadzianin Ukrainy, jaki kiravaŭ aŭtamabilem «Opiel‑Mavana», nie vybraŭ biaśpiečnuju chutkaść ruchu i dystancyju z aŭtamabilem «HAZ‑3307», jaki ruchaŭsia napieradzie ŭ spadarožnym napramku, i sutyknuŭsia ź im. U vyniku DTZ pasažyr niamieckaha aŭtamabila — 34‑hadovy hramadzianin Ukrainy — z palitraŭmaj, adkrytaj čerapna‑mazhavoj traŭmaj, udaram hałaŭnoha mozhu, pierałomam asnavańnia čerapa, pierałomam levaha ściahna špitalizavany ŭ Baranavickuju haradskuju balnicu. Abodva kiroŭcy nie paciarpieli.
U 10.25 praktyčna na hetym ža miescy z anałahičnaj pryčyny adbyłosia jašče adno DTZ. 21‑hadovy žychar horada Ivacevičy, jaki znachodziŭsia za rulom aŭtamabila «Miersiedes‑Bienc», sutyknuŭsia z hruzavikom «ZiŁ». U hetaj avaryi paciarpieŭ pasažyr hruzavoha aŭtamabila — 22‑hadovy žychar Pružanskaha rajona. U jaho zakrytaja čerapna‑mazhavaja traŭma i ŭdaranaja rana pravaha vucha. Małady čałaviek taksama źmieščany na lačeńnie ŭ Baranavickuju haradskuju balnicu. Kiroŭcy transpartnych srodkaŭ nie paciarpieli.
Na darohach vobłaści z pačatku hetaha hoda ŭ 214 DTZ atrymali traŭmy roznaj stupieni ciažkaści 211čałaviek, 41 čałaviek zahinuŭ.
