Hałoŭny trenier futbolnaj zbornaj Šviecyi Eryk Chamren raźličvaje na pieramohu ŭ tavaryskim matčy z kamandaj Biełarusi, jaki projdzie 2 červienia na minskim stadyjonie «Dynama» (pačatak ŭ 20:30).
«Ź nieciarplivaściu čakajem hetaj sustrečy. Dumaju, kamandy pakažuć cikavy futboł», — skazaŭ Chamren na pres‑kanfierencyi ŭ Minsku 1 červienia.
Hety śpiecyjalist pačaŭ pracu sa zbornaj u listapadzie 2009 hoda, źmianiŭšy Łarsa Łahierbieka, pad kiraŭnictvam jakoha šviedy nie zmahli vyjści ŭ finał čempijanatu śvietu‑2010. «Ja nie tak doŭha pracuju sa zbornaj, tamu mnie važna ŭbačyć kamandu ŭ spravie, adnosiny futbalistaŭ da hulni, kamandny duch, asabliva na čužym poli. Zaŭsiody chočacca vyjhrać. Pahladzim, jak atrymajecca zaŭtra. Naša meta — pieramoha», — adznačyŭ Chamren.
Pavodle słoŭ treniera šviedaŭ, pra biełaruskuju zbornuju jamu viadoma niašmat. «Viedaju, što jana dabiłasia dobrych vynikaŭ u apošnich tavaryskich matčach (2:2 z Handurasam, 1:0 z Paŭdniovaj Karejaj). Pamiataju, jak letaś vaša maładziožnaja zbornaja hulała ŭ finale čempijanatu Jeŭropy ŭ Šviecy».
U składzie zbornaj Šviecyi 17 hulcoŭ. Chamren nie ličyć, što heta mała: «U matčy dazvolena šeść zamien, tamu nie baču prablemy».
Trenier taksama paviedamiŭ, što pasprabuje viarnuć u zbornuju jaje lidera Złatana Ibrahimaviča, jaki admoviŭsia ad vystupleńniaŭ paśla niaŭdačy Šviecyi ŭ kvalifikacyi ČS‑2010.
Zbornaja Biełarusi sustrakałasia sa šviedami ŭ kvalifikacyi čempijanatu śvietu 1998 hoda (1:5 u Stakholmie, 1:2 u Minsku).
