Alaksandr Łukašenka 2 červienia nakirujecca ź vizitam u Azierbajdžan. Pra heta paviedamiŭ siońnia śpikier Pałaty pradstaŭnikoŭ Nacyjanalnaha schodu Biełarusi Uładzimir Andrejčanka na sustrečy z azierbajdžanskaj parłamienckaj delehacyjaj u Minsku.
«Dumaju, našym uzajemaadnosinam budzie nadadzieny novy impuls raźvićcia», — zajaviŭ jon.
Andrejčanka paviedamiŭ, što ŭ Biełarusi »ŭ cełym zadavoleny adnosinami z Azierbajdžanam». «Vielmi važna, što, niahledziačy na ekanamičny kryzis u śviecie, naš tavaraabarot u 2009 hodzie nie tolki nie ŭpaŭ, ale navat krychu padros», — skazaŭ śpikier.
Staršynia kamisii parłamienta Azierbajdžana pa mižnarodnych adnosinach i mižparłamienckich suviaziach Samied Sieidaŭ paviedamiŭ, što vizit Alaksandra Łukašenki ŭ Azierbajdžan «vialiki honar». Pavodle jaho słoŭ, kiraŭnictva dźviuch krain robić usio dla raźvićcia ekanamičnych, palityčnych, kulturnych adnosinaŭ.
Sieidaŭ adznačyŭ, što Biełaruś źjaŭlajecca stratehičnym partnioram Azierbajdžana pa mnohich kirunkach. »My možam nie tolki raźvivać uzajemaadnosiny, ale i pakazvać prykład inšym dziaržavam, jak raźvivać ekanomiku», — skazaŭ jon.
Nahadajem, 25 maja pasoł Azierbajdžana ŭ Biełarusi Ali Tejmur ahły Nahijeŭ paviedamiŭ žurnalistam, što padčas vizitu Łukašenki ŭ Baku kiraŭniki dźviuch krain płanujuć abmierkavać »šyrokaje koła pytańniaŭ». Čakajecca, u pryvatnaści, što prezidenty razhledziać supracoŭnictva ŭ enierhietyčnaj śfiery. Nahijeŭ padkreśliŭ, što śpiecyjalisty Azierbajdžana i Biełarusi ŭžo abmiarkoŭvali hetuju temu. »Tut nijakich pytańniaŭ niama, treba znajści punkty sutyknieńnia, jakija buduć vyhadnyja abodvum bakam», — skazaŭ pasoł. Pavodle jaho słoŭ, Azierbajdžan hatovy ŭdzielničać u roznych enierhietyčnych prajektach, siarod jakich «Nabuka» i «Adesa — Brody».
Alaksandr Łukašenka naviedaŭ Azierbajdžan z aficyjnym vizitam u mai 2007 hoda. Tady byŭ padpisany dahavor ab družbie i supracoŭnictvie pamiž dźviuma krainami i pakiet pahadnieńniaŭ ab uzajemadziejańni ŭ roznych śfierach.
Ilcham Alijeŭ naviedaŭ Biełaruś u listapadzie 2009 hoda.
Pavodle źviestak pres‑słužby Pałaty pradstaŭnikoŭ, u 2009 hodzie ŭzajemny tavaraabarot skłaŭ 124,6 młn. dalaraŭ, pavialičyŭšysia ŭ paraŭnańni z 2008 hodam na 11,6%. Pavodle vynikaŭ studzienia—sakavika 2010 hoda tavaraabarot pamiž krainami skłaŭ 42,8 młn. dalaraŭ i ŭ paraŭnańni z anałahičnym pieryjadam 2009 hoda vyras na 27,8%.
Treba adznačyć, što siońnia ŭ Baku prachodzić šostaje pasiadžeńnie mižuradavaj biełaruska‑azierbajdžanskaj kamisii pa handlova‑ekanamičnym supracoŭnictvie pad staršynstvam pieršaha vice‑premjera ŭrada Azierbajdžana Jahuba Ejubava i vice‑premjera Biełarusi Andreja Kabiakova.
Siarhiej Karalevič, BiełaPAN.
