Dakładnaja pazicyja dziaržaŭnych orhanaŭ u adnosinach da infarmacyjnych interniet‑resursaŭ, sietak i sistem, jakija nieabchodna rehistravać, budzie abvieščana ŭ chutkim časie.
Pra heta paviedamili pradstaŭniki Ministerstva suviazi i infarmatyzacyi 2 červienia ŭ Minsku na pasiadžeńni kruhłaha stała, pryśviečanaha realizacyi ŭkaza prezidenta № 60 ab raźvićci nacyjanalnaha siehmienta sietki interniet, jaki nabyvaje moc 1 lipienia.
«Siońnia ŭ Minsuviazi prachodzić narada z udziełam zacikaŭlenych bakoŭ, uklučajučy raspracoŭščykaŭ ukaza, ab vyznačeńni tych kankretnych infarmacyjnych resursaŭ, sietak abo sistem, jakija nieabchodna rehistravać. Čakajecca, što siońnia, u apošnim vypadku zaŭtra, budzie ahučana dakładnaja pazicyja, jakaja da momantu zakančeńnia rehistracyi — 1 lipienia — užo nie źmienicca», — skazaŭ hałoŭny śpiecyjalist upraŭleńnia elektrasuviazi Minsuviazi Pavieł Pietrulevič.
Miarkujučy pa ŭsim, budzie taksama kančatkova vyrašana pytańnie adnosna taho, ci nieabchodna budzie rehistracyja elektronnych paštovych skryniaŭ, u tym liku, fizičnych asob.
«Hetaje pytańnie vyvučajecca bolš hłyboka. Ja dumaju siońnia‑zaŭtra budzie vyznačana pazicyja orhanaŭ dziaržaŭnaha kiravańnia adnosna rehistracyi skryniaŭ u pryncypie», — zaznačyŭ śpiecyjalist Minsuviazi.
Jon padkreśliŭ, što ŭkaz №60 byŭ pryniaty ŭ lutym i raniej nieadnarazova abmiarkoŭvaŭsia na stadyi raspracoŭki, u tym liku z pradstaŭnikami hramadskich asacyjacyj «Infapark» i «Bielinfakam». U vyniku kanceptualnyja zaŭvahi byli ŭličany, i ŭ prajekt dakumienta byli ŭniesieny značnyja źmieny ŭ lepšy bok jašče na stadyi jaho padrychtoŭki.
Pradstaŭniki Minsuviazi zaznačyli, što na sajcie ministerstva ŭžo raźmieščany śpis pytańniaŭ i adkazaŭ z rastłumačeńniami realizacyi ŭkaza №60, jašče adzin pavinien źjavicca ŭ chutkim časie.
Adnak na siońniašnim pasiadžeńni kruhłaha stała z boku zacikaŭlenych interniet‑kampanij i pradstaŭnikoŭ interniet‑supolnaści znoŭ prahučała vielmi vialikaja kolkaść krytyčnych zaŭvah na adras jak samoha ŭkaza №60, hetak i dakumientaŭ pa jaho realizacyi. Jany, na dumku ŭdzielnikaŭ interniet‑rynku, majuć ceły šerah słabych miescaŭ, niedapracovak i roznačytańniaŭ.
Ukaz «Ab mierach pa ŭdaskanalvańni vykarystańnia nacyjanalnaha siehmienta sietki interniet», jaki nabyvaje moc 1 lipienia, byŭ padpisany prezidentam 1 lutaha hetaha hoda. Aficyjna było zajaŭlena, što dakumient skiravany «na abaronu intaresaŭ hramadzian, hramadstva i dziaržavy ŭ infarmacyjnaj śfiery, pavyšeńnia jakaści i patańnieńnie interniet‑pasłuh, zabieśpiačeńnie dalejšaha raźvićcia nacyjanalnaha siehmienta sietki interniet».
