Iranskija biźniesmieny majuć namier pabudavać na bierazie Zasłaŭskaha vadaschovišča turystyčnuju viosku va ŭschodnim styli. Pra heta paviedamiŭ siońnia na sustrečy ŭ Minskim abłvykankamie Nadzvyčajny i Paŭnamocny Pasoł Isłamskaj Respubliki Iran u Biełarusi Siejed Abdała Chasiejni.
Turyscka‑zabaŭlalny kompleks «Piersipolis», pa zadumcy inviestaraŭ, pavinien stać šedeŭram architektury, pryhažejšym turystyčnym abjektam nie tolki Biełarusi, ale i ŭsiaho rehijonu Uschodniaj Jeŭropy. Hety inviestycyjny prajekt abmiarkoŭvaŭsia ŭ čas vizitu ŭ Biełaruś u minułym hodzie delehacyi Tehieranskaj pravincyi na čale z hubiernataram.
Jak rastłumačyŭ žurnalistam staršynia kamiteta ekanomiki Minabłvykankama Alaksandr Turčyn, papiaredni košt inviestycyjnaha prajekta aceńvajecca ŭ sumu kala $1 młrd. Płanujecca ŭžo da kanca červienia pravieści ŭsie nieabchodnyja pierahavory, vyznačyć umovy realizacyi prajekta. Taksama iranskija kampanii zacikaŭleny ŭ supracoŭnictvie ŭ śfiery sielskaj haspadarki, miedycyny i inš.
Staršynia Minabłvykankama Barys Batura ŭ svaju čarhu adznačyŭ, što handlova‑ekanamičnaje supracoŭnictva pamiž Biełaruśsiu i Iranam intensiŭna raźvivajecca dziakujučy rehularnym sustrečam lideraŭ dźviuch dziaržaŭ. Heta sadziejničaje naładžvańniu kantaktaŭ na rehijanalnym uzroŭni, adbyłosia niekalki vizitaŭ jak pradstaŭnikoŭ dziełavych kołaŭ Irana ŭ staličny rehijon, tak i biełaruskich biźniesmienaŭ u Iran. Na Minščynie realizujecca maštabny prajekt z udziełam iranskich inviestycyj pa budaŭnictvu transpartna‑łahistyčnaha centra «Pryleśsie».
«Dumaju, prysutnaść takoj pradstaŭničaj delehacyi siońnia ŭ abłvykankamie padkreślivaje cikavaść da našaha rehijonu, i my zmožam pašyryć inviestycyjnaje, handlova‑ekanamičnaje supracoŭnictva», — skazaŭ Barys Batura i dadaŭ, što isnujučy ŭzrovień tavaraabarotu nie zadavolvaje abodva baki, jaho možna značna pavialičyć.
Siońnia na sustrečy prysutničała kiraŭnictva Iranskaj inviestycyjnaj kampanii, finansava‑kredytnaj ustanovy «Moła‑al‑Mavachiedzi», ahienctva «Moŭdž», inviestycyjnaj kampanii «Chami Hastare Šarh», kampanii «Piers Polis Inviest» i inš.‑0‑
