Sudom Kastryčnickaha rajona Hrodna da dzieviaci hadoŭ pazbaŭleńnia voli pryhavorany adzin z kiraŭnikoŭ AAT »Hrodnažyłbud».
Jak paviedamili ŭ Hienieralnaj prakuratury, u pole zroku pravaachoŭnych orhanaŭ jon trapiŭ letam 2009 hoda, kali pastupili źviestki ab tym, što kiraŭnik atrymlivaje niezakonnyja ŭznaharodžańni ad pradstaŭnikoŭ kamiercyjnych struktur za spryjalnaje vyrašeńnie pytańniaŭ, źviazanych z zakupkaj budaŭničych materyjałaŭ i abstalavańnia.
U listapadzie 2009 hoda jon byŭ zatrymany paśla atrymańnia čarhovaha chabaru prykładna na 8 tys. jeŭra. U dačynieńni da jaho była raspačata sprava na padstavie č. 1 art. 430 Kryminalnaha kodeksa (atrymańnie chabaru). Padčas śledstva byŭ dakazany jašče adzin epizod atrymańnia chabaru ad kiraŭnika adnoj z kamiercyjnych struktur bolš jak na 5 tys. jeŭra.
Ź inicyjatyvy prakuratury Hrodzienskaj vobłaści apošniaje pasiadžeńnie suda z abviaščeńniem pryhavoru adbyłosia ŭ aktavaj zale AAT «Hrodnažyłbud», dzie prysutničali kiraŭniki i śpiecyjalisty hetaha budaŭničaha pradpryjemstva.
U apošnim słovie abvinavačany pryznaŭ svaju vinu ŭ niezakonnym atrymańni hrošaj. Sud jaho dziejańni kvalifikavaŭ na padstavie č. 2 art. 430 KK i pryznačyŭ pakarańnie ŭ vyhladzie pazbaŭleńnia voli terminam na dzieviać hadoŭ z kanfiskacyjaj majomaści.
Prysud nabyŭ zakonnuju moc.
