U Biełarusi płanujecca ŭzmacnić administracyjnuju adkaznaść hramadzian za vykid śmiećcia ŭ nienaležnym miescy.
Pra heta paviedamiła siońnia na pres‑kanfierencyi doktar‑hihijenist adździaleńnia kamunalnaj hihijeny Respublikanskaha centra hihijeny, epidemijałohii i hramadskaha zdaroŭja Iryna Žaŭniak.
Pavodle słovaŭ śpiecyjalista, jość adpaviednaje daručeńnie Savieta ministraŭ. «Zaraz hetaje pytańnie razhladajuć sumiesna ministerstvy achovy zdaroŭja, pryrodnych resursaŭ i achovy navakolnaha asiarodździa, MUS i inšyja», — skazała Iryna Žaŭniak. Adnak, dadała jana, niavyrašanym zastajecca pytańnie, chto budzie štrafavać čałavieka, jaki, da prykładu, na prypynku kinuŭ śmiećcie mima skryni.
U svaju čarhu načalnik adździeła vykarystańnia i achovy vod Ministerstva pryrodnych resursaŭ i achovy navakolnaha asiarodździa Taćciana Śliž patłumačyła, što havorka idzie pra tak zvanaje drobnaje śmiećcie, jakoje pa kłasifikacyi nie adnosicca da adkidaŭ, h.zn. drobnaha bytavoha śmiećcia. Pavodle jaje słovaŭ samymi prablemnymi miescami ŭ hetym dačynieńni źjaŭlajucca plažy, prypynki, pryharadnyja i lesaparkavyja zony. Načalnik adździeła adznačyła, što, naprykład, va Ŭkrainie za kinuty mima skryni niedakurak mohuć aštrafavać na 180 hryŭniaŭ (kala 70 tys. rubloŭ)
