U Minskim haspadarčym sudzie adbyłosia papiaredniaje słuchańnie pazovu Minharvykankamu da adukacyjnaj ustanovy «Ruch napierad», jakaja arhanizavała kampaniju «Havary praŭdu».
Vieści hetuju spravu budzie sudździa Andrej Alaškievič. Na siońniašnim pasiedžańni jon vyśviatlaŭ pazycyi bakoŭ i ich arhumenty. Pradstaŭnica ŭpravy justycyi Mienharvykankamu Emilija Paźniak paćvierdziła raniej zajaŭlenuju Mienharvykankamam pazycyju: ustanova «Ruch napierad» nibyta dała zaviedama niedakładnyja źviestki pra jurydyčny adras, parušyła dekret prezydenta i tamu musić być likvidavanaja.
Na čym hruntujecca pazycyja Mienharvykankamu? Emilija Paźniak raspaviała sudu, što «Ruch napierad» byŭ zarehistravany 2 lutaha 2010 hodu, a damova ab arendzie pamiaškańnia №5 u domie 54 pa praspekcie Mašerava była zaklučana 11 lutaha, praz 9 dzion. «Dyk u čym tut «zaviedama iłžyvyja źviestki»?» — zapytaŭ sudździa Andrej Alaškievič.
Emilija Paźniak: «U tym, što na momant rehistracyi, na 2-ha lutaha, u ich nie było navat harantyjnaha lista».
Sudździa Andrej Alaškievič: «Ci patrabuje zakon ad arandatara mieć harantyjny list napiaredadni rehistracyi?»
Emilija Paźniak: «Nie».
Sudździa Andrej Alaškievič: «U zajavie na rehistracyju paznačany hety adras?»
Emilija Paźnak: «Tak».
Sudździa Andrej Alaškievič: «Pa tym ža adrasie ŭstanova raźmiaściłasia ci pa inšym?»
Emilija Paźniak: «Pa tym ža».
I ŭsio ž pradstaŭnica Mienharvykankamu nie admoviłasia ad patrabavańnia likvidavać «Ruch napierad». Što na heta kažuć pradstaŭniki hetaj arhanizacyi?
Pradstaŭniki «Ruchu napierad» pierakananyja, što pazoŭ Mienharvykankamu suproć ichnaj ustanovy ničym nie abhruntavany, i nie vyklučajuć palityčnych pryčyn. Zasnavalnica «Ruchu napierad» Kaciaryna Vaščejka nastojvaje na tym, što zakon ustanovaj nie parušaŭsia:
«Pierad tym jak zasnavać hetuju ŭstanovu, my vyvučyli ŭsie patrabavańni zakonu i dziejničali, ničoha nie parušajučy. I my pradstavili ŭsie patrebnyja dakumenty. Tamu pierakananyja, što zakon pavinien być na našym baku».
Sudździa Andrej Alaškievič pastanaviŭ zadavolić chadajnictva pradstaŭnikoŭ «Ruchu napierad» ab zabieśpiačeńni ich patrebnymi dakumentami. Pakul hetyja dakumenty znachodziacca ŭ ofisie ŭstanovy, jaki apiačatany milicyjantami ź Leninskaha RAUS. Pavodle sudździ, razhlad pazovu Mienharvykankamu budzie pryznačany «nie raniej jak praz 2 tydni».
