Inicyjatyva stvaryć niezaležny studencki prafsajuz prahučała na kanfierencyi pa pravach čałavieka ŭ Minsku 13 červienia. Arhanizatarami kanfierencyi vystupili aktyvisty maładziožnaj prafsajuznaj hrupy «Studenckaja rada», jakaja isnuje z 2008 hoda.
Udzielniki sustrečy havaryli pra nieabchodnaść kansalidavacca dla taho, kab adstojvać svaje pravy. «My vystupajem za stvareńnie niezaležnaha studenckaha prafsajuza. Bolšaść studentaŭ ničoha nie viedajuć pra svaje pravy, i ŭ mnohich kanfliktnych situacyjach jany nie viedajuć, što rabić», — skazała adna z arhanizataraŭ kanfierencyi Alaksandra Dzikan.
U jakaści prykładu pryvodziłasia sistema abaviazkovaha raźmierkavańnia vypusknikoŭ VNU. Pavodle mierkavańnia ŭdzielnikaŭ sustrečy, raźmierkavańnie nie pavinna być zavočnym i vyrašacca tolki na ŭzroŭni kiraŭnictva VNU — studenty majuć prava ŭdzielničać va ŭsich pytańniach, jakija niepasredna tyčacca ich dalejšaha losu.
Zakranalisia taksama prablemy humannaści i marali pry padrychtoŭcy
«Pravodzić treninhi niepasredna pa miechaniźmie abarony pravoŭ studentaŭ my pačali ŭ lutym hetaha hoda, — skazała Alaksandra Dzikan. — Zatym praviali anałahičnyja mierapryjemstvy ŭ sakaviku, krasaviku i dvojčy ŭ mai. U ich uziali ŭdzieł bolš za 60 studentaŭ».
«U palityku my nie leziem, — dadała aktyvistka „Studenckaj rady“ Jaŭhienija Andrajuk. — Ale kali byŭ incydent z Taćcianaj Šapućka (Šapućka ŭvachodzić u kiraŭnictva apazicyjnaj arhanizacyi „Małady front“ — Red.), jakuju adličyli z BDU nibyta za propuski, naša arhanizacyja dapamahała źbirać podpisy ŭ jaje abaronu».
«Ciapier studenckaje asiarodździe chvalujuć pytańni svabody vybaru i samavyznačeńnia, mahčymaść zamiežnych vyjezdaŭ, prablemy prymusovaha ŭstupleńnia ŭ roznyja arhanizacyi i prafsajuzy, a taksama jakaść adukacyi», — padkreśliła Alaksandra Dzikan.
