«Hazprom» moža pieraaryjentavać pastaŭki hazu ŭ Jeŭropu z hazatranspartnaj sistemy Biełarusi na hazatranspartnuju sistemu Ukrainy ŭ vypadku nieabchodnaści, zajaviŭ na pasiadžeńni prezidyuma ŭrada premjer‑ministr Rasii Uładzimir Pucin.
Taksama jon daručyŭ uradu paskoryć budaŭnictva padziemnaha schovišča hazu ŭ Kalininhradskaj vobłaści z ulikam składanaściaŭ z raźlikami za haz ź Biełaruśsiu.
«Hety abjekt pavinien być uviedzieny ŭ stroj u kancy 2011 — pačatku 2012 hoda. Pahladzicie, kali łaska, razam z kalehami i pa abjomach zachoŭvańnia, i pa terminach uviadzieńnia. Treba paskoryć uviadzieńnie hetaha abjekta», — cytuje Pucina RIA Novosti.
Kalininhradskaja vobłaść z‑za hieahrafičnaha stanovišča i vostraha deficytu ŭłasnych enierharesursaŭ znachodzicca ŭ enierhietyčnaj zaležnaści ad dziaržaŭ Bałtyi i Biełarusi, cieraz terytoryi jakich ažyćciaŭlajecca tranzit z asnoŭnaj terytoryi RF da 30% elektraenierhii, 100% pryrodnaha hazu, naftapraduktaŭ i vuhalu.
Nahadajem, 21 červienia «Hazprom» uvioŭ režym abmiežavańnia pastaŭki rasijskaha hazu ŭ Biełaruś na 15% ad abjomaŭ płanavaj pasutačnaj pastaŭki hazu z pastupovym vychadam na ŭzrovień abmiežavańnia da 85% praparcyjanalna zapazyčanaści. Rasijski hazavy chołdynh patrabuje ad Minska pahasić zapazyčanaść u 192 młn. dalaraŭ za pastaŭki hazu ŭ 2010 hodzie.
U svaju čarhu, u Minsku zajaŭlajuć, što «Hazprom» zavinavaciŭ Biełarusi bolš čym 200 młn. dalaraŭ za tranzit hazu pa biełaruskaj terytoryi.
