Pavodle vynikaŭ praviedzienaha ŭ Kyrhyzstanie refierendumu 59‑hadovaja Roza Atunbajeva zaćvierdžana ŭ jakaści kiraŭnika dziaržavy na pierachodny pieryjad.
Aficyjnyja vyniki refierendumu pa źmienie Kanstytucyi i nadzialeńni Atunbajevaj paŭnamoctvami prezidenta pierachodnaha pieryjadu apublikavany va ŭradavaj haziecie «Erkin‑Too» 2 lipienia, paviedamlaje ahienctva Novosti.kg.
Usienarodny refierendum pa pryniaćci novaj Kanstytucyi i ab daviery časovamu ŭradu na čale z Atunbajevaj, jaki pryjšoŭ da ŭłady 7 krasavika paśla źviaržeńnia prezidenta Kurmanbieka Bakijeva, adbyŭsia ŭ Kyrhyzstanie 27 červienia. Pavodle aficyjnaj infarmacyi, vybarščyki absalutnaj bolšaściu hałasoŭ zhadzilisia z nadzialeńniem Atunbajevaj paŭnamoctvami prezidenta pierachodnaha pieryjadu da 2012 hoda. Zhodna z novaj Kanstytucyjaj, praktyčna ŭsia paŭnata dziaržaŭnaj ŭłady pierachodzić da parłamienta. Zakanadaŭčy orhan, jaki składajecca sa 120 deputataŭ, sfarmiravany pa partyjnych śpisach, budzie pryznačać premjer‑ministra i ŭrad.
Staršynia Centrvybarkama Akyłbiek Saryjeŭ paviedamiŭ žurnalistam, što bolš za 1,777 miljona (90,55%) vybarščykaŭ, jakija pryjšli na refierendum, prahałasavali za prapanavanyja źmieny, suprać vykazalisia 158,373 tysiačy (prykładna 8%) hramadzian, mienš za 1,5% biuleteniaŭ byli sapsavany.
Aficyjnaja cyrymonija ŭvachodžańnia na pasadu Atunbajevaj zapłanavana na 3 lipienia.
Miž inšym źvierhnuty prezident Kyrhyzstana Kurmanbiek Bakijeŭ praciahvaje znachodzicca ŭ Biełarusi, kudy prybyŭ 19 krasavika pavodle zaprašeńnia Alaksandra Łukašenki.
4 maja Roza Atunbajeva padpisała dekret ab pazbaŭleńni Bakijeva prezidenckaj niedatykalnaści na padstavie kryminalnaj spravy, zhodna ź jakoj jon abvinavačvajecca ŭ arhanizacyi zabojstvaŭ i złoŭžyvańni słužbovym stanoviščam. Adnak Łukašenka zajaviŭ, što nie źbirajecca vydavać Bakijeva novym uładam Kyrhyzstana, padkreśliŭšy, što jon «znachodzicca pad abaronaj biełaruskaj dziaržavy i prezidenta». U kancy maja ŭ Hienieralnuju prakuraturu Biełarusi pastupiŭ zapyt na vydaču Bakijeva i nieabchodnyja dla hetaha dakumienty. 10 červienia Hienprakuratura nakiravała ŭ Biškiek aficyjnuju admovu ŭ vydačy.
