Pryznačana sudovaje pasiedžańnie pavodle pazovu ab likvidacyi adukacyjnaj ustanovy «Ruch napierad», u ramkach jakoj dziejničaje prahrama «Havary praŭdu». Miž tym arhanizacyi dahetul nie viarnuli ŭstanoŭčyja dakumenty, a aktyvistam «Havary praŭdu» nie addali asabistyja rečy i hrošy.
Na 7 lipienia ŭ Mienskim haradzkim haspadarčym sudzie pryznačanaje pasiedžańnie pavodle pazovu Mienharvykankamu ab likvidacyi adukacyjnaj ustanovy «Ruch napierad». Mienharvykankam damahajecca jaje likvidacyi na toj padstavie, što nibyta «Ruch napierad» pry rehistracyi paznačyŭ niedakładny jurydyčny adras.
Pradstaŭniki arhanizacyi z hetym niazhodnyja i kažuć ab palityčnych pryčynach cisku. Namieśnik dyrektara ŭstanovy «Ruch napierad» Nina Pachłopka zhadvaje, što 10 červienia padčas papiaredniaha słuchańnia sudździa Andrej Alaškievič zadavoliŭ chadajnictva «Ruchu napierad» ab pradstaŭleńni statutnych dakumentaŭ, jakija zastalisia ŭ ich ofisie, jaki dahetul apiačatany milicyjantami Leninskaha RAUS
«Takim čynam, biaz dostupu ŭ ofis my nia možam padrychtavać dakumenty, jakija patrebnyja ŭ sudzie. Śledčyja miesiac abiacajuć źniać plomby ź dźviarej ofisu, ale kožny raz niešta nibyta nie atrymlivajecca», — paviedamiła Nina Pachłopka:
«Ja mieła honar sustrakacca z načalnikam adzieła papiaredniaha raśśledavańnia Sukałam Anatolem Mikałajevičam, jaki mnie paabiacaŭ, što siońnia adkryjuć ofis i daduć nam piačatku i ŭstanoŭčyja dakumenty. Ale siońnia ŭžo skazaŭ, što da jaho pryjaždžaje niechta jakraz pa našaj spravie i jon ničoha nia moža dla nas zrabić. Na heta ja zaŭvažyła, što my nia zmožam abaraniacca ŭ haspadarčym sudzie. A jon kaža: nu i što, u hetym nia vy ž vinavatyja?»
Nina Pachłopka nie vyklučaje, što ŭstanoŭčyja dakumenty «Ruchu napierad» nie vydajuć admysłova, kab potym zaličyć niajaŭku adkaźnika ŭ sud i vyrašyć spravu na karyść Mienharvykankamu.
10‑ha červienia na papiarednim pasiedžańni sudu pradstaŭnica ŭpravy justycyi Mienharvykankamu Emilija Paźniak paćvierdziła pretenzii da «Ruchu napierad» adnosna niedakładnych źviestak, ale pry hetym nie zmahła peŭna patłumačyć sudu, u čym dakładna vinavataja arhanizacyja. Dać kamentar dla «Svabody» Emilija Paźniak admoviłasia.
18 traŭnia ŭ ofisie «Ruchu napierad», dzie mieścicca štab kampanii «Havary praŭdu», a taksama na kvaterach bolš jak 20 aktyvistaŭ prajšli pieratrusy pavodle kryminalnaj spravy ab paviedamleńni niepraŭdzivych źviestak adnosna tavaraŭ i pasłuhaŭ. Paśla pieratrusaŭ u aktyvistaŭ «Havary praŭdu» zabrali asabistyja hrošy, kamputary, arhtechniku. Śledčyja ź Leninskaha rajadździełu milicyi Miensku, jakija viaduć spravu, ničoha nie kamentujuć i admaŭlajucca paviedamić, kali viernuć hrošy i kamputary aktyvistam. Nina Pachłopka kaža, što dahetul nikomu ničoha nie viarnuli, u tym liku i joj:
«Paŭtara miesiaca minuła, ale ž nie viadziecca nijakich śledčych dziejańniaŭ. Nikoha nie vyklikali ni ŭ jakim statusie, nikomu ničoha nie viarnuli. Nijakich niama zruchaŭ».
