«Małady front»: chto dazvoliŭ BRSMu ładzić akcyi suprać NTV? 8

Mižnarodnaje maładziožnaje abjadnańnie «Małady front» (Čechija) prosić Minharvykankam rastłumačyć, na jakoj padstavie aktyvisty Biełaruskaha respublikanskaha sajuza moładzi (BRSM) praviali vuličnuju akcyju suprać telekanała NTV. Adpaviedny zvarot byŭ nakiravany 8 lipienia ŭ Minharvykankam, paviedamiŭ kiraŭnik «Maładoha frontu» Dźmitryj Daškievič.

6 lipienia na staličnaj płoščy kala Kamaroŭskaha rynka aktyvisty BRSM praviali pierformans «Śpiecyjalna dla NTV!». Kala ŭvachodu na rynak była zładžana impravizavanaja haścinaja sa staroj kanapaj, dyvanom i televizaram z zastaŭkaj «Aściarožna! Śmiardzić kanał NTV!». Na ŭdzielnikach pierformansu byli zaścierahalnyja kaściumy i procivahazy. Prachožym jany razdavali ŭlotki z rekamiendavanymi srodkami zaściarohi pry prahladzie kanała NTV — procivahaz, haspadarčaje myła, tualetnaja papiera i aśviažalnik pavietra. Udzielniki akcyi pry dapamozie miehafona zaklikali prachožych atrymać instruktaž, nieabchodny pry prahladzie kanała NTV: «Treba pamyć ruki, nadzieć procivahaz i ŭziać bałončyk z aśviažalnikam!»

Na bakach dla śmiećcia, ustanoŭlenych na prypynkach uzdoŭž praśpiekta Niezaležnaści, aktyvisty arhanizacyi raźmiaścili nalepki z nadpisam «Śpiecyjalna dla NTV!».

U «Maładym froncie» źviazvajuć praviadzieńnie BRSM hetaj akcyi z pakazam 4 lipienia na kanale NTV u prahramie «Nadzvyčajnaje zdareńnie» dakumientalnaha filma «Chrosny baćka».

U im havaryłasia pra dačynieńnie vyšejšych słužbovych asob Biełarusi da zahadkavaj śmierci vice-śpikiera Viarchoŭnaha Savieta Hienadzia Karpienki, vykradańniaŭ i zabojstvaŭ byłoha ministra ŭnutranych spraŭ Juryja Zacharanki, vice-śpikiera Viarchoŭnaha Savieta, byłoha kiraŭnika Centrvybarkama Viktara Hančara, žurnalista Dźmitryja Zavadskaha, biźniesmiena Anatola Krasoŭskaha. I ŭžo 6 lipienia BRSM pravodzić pikiet», — adznačyŭ Daškievič.

«Małady front» źviartaje ŭvahu, što akcyja BRSM adbyłasia ŭsiaho praz dvoje sutak paśla pakazu NTV dadzienaha filma. «Ahulnaviadoma, što,

pavodle zakanadaŭstva Biełarusi, zajaŭki na masavuju akcyju ci pikiet pavinny padavacca za 15 dzion da jaje praviadzieńnia. Film „Chrosny baćka“ byŭ pakazany 4 lipienia. Tamu patrebna być ekstrasensam ci prazarliŭcam, kab pradbačyć źjaŭleńnie hetaha filma: zahadzia padać na pikiet zajaŭku za 10 dzion da vychadu filma, atrymać dazvoł na praviadzieńnie akcyi.

Vidavočnaje parušeńnie biełaruskaha zakanadaŭstva: ci dazvoł na praviadzieńnie akcyi byŭ dadzieny niezakonna, ci akcyja ŭsio-taki nie była sankcyjanavanaja», — skazaŭ Daškievič.

Inicyjatary zvarotu patrabujuć pryciahnuć udzielnikaŭ i arhanizataraŭ pikietu suprać NTV da adkaznaści.

Siarhiej Pulša, BiełaPAN

Chočaš padzialicca važnaj infarmacyjaj ananimna i kanfidencyjna? Pišycie redaktaru «Našaj Nivy» ŭ TH