Ale fiestyval moža prajści ŭ inšym miescy.
Arhanizatary festu atrymali adkaz ad ukrainskich čynoŭnikaŭ. U liście za podpisam namieśnika mera Čarnihava admova tłumačycca tym, što vybranaje dla praviadzieńnia fiestyvalu miesca na bierazie Dzisny źjaŭlajecca łandšafta-reakcyjnaj zonaj ahulnaharadskoha značeńnia. I vykarystańnie hetaj terytoryi pad fest
moža pryvieści da naniasieńnia škody ci źniščeńnia asobnych vidaŭ raślinaŭ.
U dadatak u liście idzie havorka pra toje, što arhanizataram patrebna pravieści daśledavańnie akvatoryi raki, arhanizavać vyratavalny post, uzhadnić usie pytańni ź miascovym adździełam MNS i sanipidemstancyjaj.
Vital Supranovič kaža, što kali meryja admoviła ŭ praviadzieńni festu, to abaviazkova admoviać i pieraličanyja słužby. Tamu niama sensu da ich źviartacca.
Ale sp. Supranovič kaža, što ŭsio-tki fest moža adbycca sioleta.
Ciapier viaducca pieramovy ź inšymi ŭkrainskimi haradami. I kali chutka atrymajecca vyrašyć usie arhanizacyjnyja pytańni, to Be Free projdzie. Sp. Supranovič nie vyklučaje, što pieranieści daviadziecca i na miesiac. A pakul arhanizatary jašče vyrašajuć jak reahavać na atrymanuju admovu. Mahčyma, budzie padadziena skarha.
Nahadajem, što ŭ pačatku tydnia arhanizatary zajavili ab admienie sioletniaha festu. Pryčyna była ŭ tym, što čarnihaŭskaja meryja admaŭlałasia dać jaki-niebudź adkaz na ich zapyt.
Rok fiestyval Be Free uźnik u 2007 hodzie pad nazvaj «Prava być svabodnym». U papiarednija hady jon prachodziŭ na zachadzie Ukrainy — u haradach Łuck i Lvoŭ. Letaś jon adbyŭsia ŭ Čarnihavie, dzie vyrašyli pravodzić jaho i nadalej. Udzieł u im prymali «Lapis Trubiecki», «Vopli Vidaplasava», «Krama», B:N, ZATOCZKA, Pomidor/OFF, Znich, Vladivostok i inšyja. Sioleta jon pavinien byŭ prajści 21-23 žniŭnia.
