Siaredniaja tempieratura lipienia akazałasia rekordna vysokaj.
Za sotniu hadoŭ nazirańnia takoj haračaj siaredziny leta jašče nie było.
A žnivień paddaje žaru. Na ŭschodzie krainy ŭ nastupnyja dni čakajecca da 38—40 hradusaŭ!
Najhoršaje čakaje Uschodniaje Paleśsie, Padniaproŭje i Pasožža. U Homieli na sieradu i čaćvier abiacajuć plus 38, u piatnicu — 39, a ŭ subotu — 40! Navat nočy nie pryniasuć palohki, bo pavietra budzie astyvać tolki da 24—25 hradusaŭ.
Takija tempieratury zvykłyja dla pustyniaŭ, ale nie dla Biełarusi ź jaje ŭmieranym klimatam.
Asablivaj śpiokaju adznačacca piatnica i subota — tempieratury 35—40 hradusaŭ prahnazujucca na bolšaj častcy terytoryi. Łahadniejšyja dni čakajucca tolki ŭ zachodniaj častcy Biełarusi.
U niadzielu haračynia trochu pačnie spadać, ale nie ŭsiudy: skvar raspaŭsiudzicca na Paniamońnie.
Jak patłumačyła hałoŭny sinoptyk Hidramieteacentra Volha Fiadotava, haračynia da nas idzie z boku Azii — ź Mižziemnaha mora. Nad Uschodniaj Jeŭropaju navis mahutny antycykłon. Zona vialikaha cisku nie daje prabicca da našych ziemlaŭ chałodnamu pavietru z Atłantyki.
U lipieni miedyki kanstatavali pavieličeńnie kolkaści vypadkaŭ prablemaŭ sa zdaroŭjem, asabliva ŭ sardečnikaŭ. Parušyŭsia i pracoŭny rytm: pryvatniki adpuścili rabotnikaŭ, na dziaržpradpryjemstvach skaročany pracoŭny dzień.
Sinoptyki nie źviazvajuć anamalnuju śpioku z hłabalnym paciapleńniem. Sprava ŭ raźmierkavańni tempieraturnaha režymu. «Zimoj u nas tempieratura była nižejšaj za normu, ciapier vyšejšaja. U Łacinskaj Amierycy ciapier nazirajucca redkija dla miascovaha klimatu marazy,» — paviedamiła V.Fiadotava.
Tolki nam ad taho nie lahčej.
