Sioleta Biełaruś zastałasia biez prajektaŭ i finansavańnia Jeŭrapiejskaha banka rekanstrukcyi i raźvićcia.
Chacia minuły hod byŭ adznačany rekordnaj aktyŭnaściu ŭ historyi ŭzajemaadnosinaŭ hetaj mižnarodnaj finansavaj arhanizacyi i Biełarusi.
Mižnarodnaja finansavaja karparacyja, Jeŭrapiejski bank rekanstrukcyi i raźvićcia i inšyja mižnarodnyja finansavyja struktury naroŭni z pryvatnymi inviestarami źjaŭlajucca važnymi krynicami resursaŭ dla ekanomik šmat jakich krainaŭ u stadyi raźvićcia.
Dziejnaść JEBRR, stvoranaha dla padtrymki rynkavych reformaŭ u 29 krainach, raspaŭsiudžvajecca ad Centralnaj Jeŭropy da Centralnaj Azii. Heta adzin z najbujniejšych inviestaraŭ u rehijonie, jaki aproč vyłučeńnia svaich srodkaŭ pryciahvaje značnyja abjomy pramych zamiežnych inviestycyjaŭ. Struktura ŭkładaje kapitał hałoŭnym čynam u pryvatnyja pradpryjemstvy, jak praviła, sumiesna sa svaimi kamiercyjnymi partniorami. Pry hetym inviestycyi iduć jak u novyja vytvorčaści, tak i ŭ dziejučyja firmy. JEBRR taksama pracuje ź dziaržaŭnymi kampanijami ŭ metach padtrymki pracesaŭ pryvatyzacyi i strukturnaj rearhanizacyi, a taksama ŭdaskanaleńnia kamunalnaj haspadarki.
Biełaruś supracoŭničaje ź JEBRR z 1992 hoda i zajmaje 23-je miesca pa abjomach pryciahnutych srodkaŭ hetaj arhanizacyi. Za 1992-2010 hady ŭ ekanomiku krainy na 27 prajektaŭ było inviestavana 300,8 młn jeŭra.Pryčym, jak i ŭ vypadku sa Słavakijaj, Słavienijaj, Estonijaj, Turcyjaj i Manholijaj, partniorami JEBRR stali pryvatnyja biełaruskija pradpryjemstvy.
Mienš srodkaŭ ad hetaha inviestara siarod 29 dziaržavaŭ atrymali tolki pradpryjemstvy i dziaržstruktury Turcyi, Manholii, Kyrhyztana, Turkmienistana, Tadžykistana i Čarnahoryi.
U 2009 hodzie namieciŭsia niejki pierałom u stasunkach Biełarusi i JEBRR. Była zafiksavanaja rekordnaja kolkaść prajektaŭ, u jakich JEBRR pryniaŭ udzieł na roznych umovach. Heta, u pryvatnaści, vyłučeńnie srodkaŭ «Biełhazprambanku» i Mienskamu tranzitnamu banku dla finansavańnia małoha biznesu, kredyt «Pinskdrevu», a taksama nabyćcio JEBRR 25% akcyjaŭ u sietcy kramaŭ dziciačaj vopratki «Buślik».
Niekatoryja ekśpierty mierkavali, što va ŭmovach źnižeńnia cikavaści pryvatnaha kapitału da inviestavańnia ŭ biełaruskuju ekanomiku, vyklikanaha nastupstvami suśvietnaha finansava-ekanamičnaha kryzisu, strukturnyja inviestary nakštałt MFK i JEBRR pavialičać hrašovyja ŭlivańni ŭ biełaruski pryvatny siektar.
Adnak pakul hetyja mierkavańni nie spraŭdžvajucca. MFK chacia i abviaściła pra dva prajekty ŭ Biełarusi, pieramovy pa ich jašče nie zavieršanyja. Šerah pryvatnych biełaruskich kampanijaŭ taksama viali pieramovy ź JEBRR. Viadoma, što ŭ traŭni na pasiedžańni rady kirujučych dyrektaraŭ JEBRR prysutničali pradstaŭniki «Pinskdreva» i «Kraviry», jakija razhladajuć JEBRR jak dadatkovuju krynicu pryciahnieńnia resursaŭ.
Ale za studzień-lipień 2010 hoda JEBRR nie ŭchvaliŭ nivodnaha biełaruskaha prajekta.
