Dakładčyca pa Biełarusi kamisii Parłamienckaj asamblei Rady Jeŭropy (PARIE) pa palityčnych pytańniach Sinika Churskajnien pryjechała ŭ Minsk, kab «sabrać infarmacyju, sustrecca ź ludźmi i abmierkavać toje, što adbyvajecca ŭ krainie».Ab hetym jana zajaviła 23 žniŭnia na sustrečy z namieśnikam staršyni Pałaty pradstaŭnikoŭ Nacyjanalnaha schodu Biełarusi Viktaram Huminskim.
Pavodle słoŭ Churskajnien, jaje cikavić situacyja ŭ Biełarusi pa troch pytańniach — pravy čałavieka, demakratyja i viaršenstva zakona. «Ja chacieła b daviedacca, što zroblena ŭ Biełarusi paśla našaha apošniaha vizitu. Ja viedaju, što jość i kiepskija naviny, jakija tyčacca vyniasieńnia novych śmiarotnych pryhavoraŭ», — zaŭvažyła jana.
Sa svajho boku Huminski vykazaŭ upeŭnienaść u tym, što Biełaruś rana ci pozna stanie raŭnapraŭnym členam PARIE. «My vitajem vaš vizit, ličym, što jon pasłužyć raźvićciu kantaktaŭ pamiž biełaruskim parłamientam i PARIE», — skazaŭ deputat.
Jon padziakavaŭ Churskajnien za kanstruktyŭny padychod da raźvićcia adnosin pamiž PARIE i Biełaruśsiu.
«Ja viedaju, što vy majecie samyja dobryja pačućci da Biełarusi i jaje naroda», — skazaŭ Huminski.
Vizit dakładčycy PARIE pa Biełarusi budzie doŭžycca try dni. Sinika Churskajnien praviadzie šerah aficyjnych sustreč — z kiraŭnictvam abiedźviuch pałat parłamienta, ministram justycyi Viktaram Hałavanavym, hienprakuroram Ryhoram Vasilevičam, namieśnikam ministra zamiežnych spraŭ Valeryjem Varanieckim, ministram infarmacyi Aleham Pralaskoŭskim, kiraŭnikom rabočaj hrupy parłamienta pa pytańniach śmiarotnaj kary Mikałajem Samasiejkam.
Zapłanavany taksama sustrečy z pradstaŭnikami apazicyi i niedziaržaŭnych arhanizacyj.
Apošni raz Churskajnien była ŭ Biełarusi ŭ lutym hetaha hoda razam z papiarednim dakładčykam PARIE pa situacyi ŭ Biełarusi Andrea Ryhoni.
U kancy krasavika Sinika Churskajnien pradstaviła prajekt rezalucyi pa Biełarusi, dzie zaklikała Radu Jeŭropy prypynić kantakty na vysokim uzroŭni, ale pradoŭžyć dyjałoh z uładami i hramadzianskaj supolnaściu.
U chodzie debataŭ u PARIE jana adznačyła, što praces zbližeńnia pamiž Biełaruśsiu i RIE, jaki pačaŭsia niekalki hadoŭ tamu, «znoŭ spyniŭsia pa mnohich pryčynach». U liku takich pryčyn Churskajnien nazvała novyja vypadki prymianieńnia śmiarotnaj kary, ucisk na niezaležnyja ŚMI, hramadzianskuju supolnaść, apazicyjnyja struktury i polskuju mienšaść.
Pry hetym finski deputat vykazałasia za praciah dyjałohu ź Minskam i padkreśliła niemahčymaść viartańnia da palityki izalacyi. «My čakajem ad Biełarusi dakładny palityčny sihnał z samaha vysokaha ŭzroŭniu, što kraina hatova supracoŭničać z nami i dasiahać adčuvalnych vynikaŭ», — zajaviła Churskajnien.
