Biełaruś i Łatvija padpisali pahadnieńnie ab sproščanym pierasiačeńni miažy

Biełaruś i Łatvija padpisali mižuradavaje pahadnieńnie ab sproščanym paradku ŭzajemnych pajezdak žycharoŭ pryhraničnych terytoryj dźviuch krain.

Dakumient padpisany 23 žniŭnia padčas adnadzionnaha vizitu ŭ Łatviju kiraŭnika biełaruskaha źniešniepalityčnaha viedamstva Siarhieja Martynava, paviedamlaje pres-słužba MZS Biełarusi.

Pahadnieńnie daje žycharam pryhraničnych rajonaŭ Biełarusi i Łatvii prava naviedvać pryhraničnyja terytoryi susiedniaj dziaržavy na padstavie dazvołaŭ, što vydajucca ŭ sproščanym paradku, z terminam dziejańnia ad adnaho da piaci hadoŭ. Košt dazvołaŭ składzie 20 jeŭra.

U śpis nasielenych punktaŭ, na jakija raspaŭsiudžvajecca dziejańnie pahadnieńnia, ź biełaruskaha boku ŭvachodziać u tym liku

Brasłaŭ, Vierchniadźvinsk, Miory, pasiołak Vidzy; z łatvijskaha — Daŭhaŭpiłs, Dahda, Ziłupie i Krasłava.

Pahadnieńnie nabudzie moc paśla vykanańnia bakami adpaviednych unutrydziaržaŭnych pracedur.

Padčas vizitu Martynaŭ sustreŭsia z prezidentam Vałdzisam Zatlersam, prem'jer-ministram Vałdzisam Dambroŭskisam, ministram zamiežnych spraŭ Ajvisam Ronisam i ministram transpartu Kasparsam Hierchardsam.

Pavodle źviestak pres-słužby MZS, kiraŭniki źniešniepalityčnych viedamstvaŭ abmierkavali ŭvieś śpiektr pytańniaŭ raźvićcia biełaruska-łatvijskaha supracoŭnictva, jak na dvuchbakovym uzroŭni, hetak i ŭ miežach mižnarodnych arhanizacyj. Aprača taho, ministry abmierkavali pierśpiektyvy ŭzajemadziejańnia pamiž Biełaruśsiu i ES, a taksama supracoŭnictva ŭ miežach prahramy «Uschodniaje partniorstva».

Z prezidentam Zatlersam abmiarkoŭvalisia «pryncypovyja pierśpiektyvy naroščvańnia biełaruska-łatvijskaha palityčnaha i ekanamičnaha supracoŭnictva», zaznačaje pres-słužba.

Padčas sustrečy z prem'jer-ministram Vałdzisam Dambroŭskisam asnoŭnaja ŭvaha była nadadziena razhladu «šyrokaha koła pytańniaŭ dvuchbakovaha handlova-ekanamičnaha ŭzajemadziejańnia, supracoŭnictva ŭ śfiery inviestycyj, transpartu, tranzitu, enierhietyki, vytvorčaj kaapieracyi». Baki taksama abmierkavali kaardynacyju dziejańniaŭ pa padrychtoŭcy zapłanavanych na 22–25 vieraśnia ŭ Ryzie Nacyjanalnaj vystavy Respubliki Biełaruś i V Mižnarodnaha biełaruska-łatvijskaha inviestycyjnaha forumu «Bałtyjski rehijon 2010».

Na sustrečy ź ministram transpartu Kasparsam Hierchardsam, jaki ŭznačalvaje łatvijskuju častku biełaruska-łatvijskaj mižuradavaj kamisii pa ekanamičnym i navukova-techničnym supracoŭnictvie, Siarhiej Martynaŭ abmierkavaŭ pierśpiektyvy ŭzajemadziejańnia ŭ śfiery transpartu i tranzitu. Dasiahnuta damoŭlenaść ab aktyvizacyi dziejnaści kamisii, nastupnaje pasiadžeńnie jakoj pavinna prajści ŭžo ŭ vieraśni hetaha hoda.

U kancy vizitu ŭ Łatviju kiraŭnik MZS Biełarusi naviedaŭ Ryžski svabodny port, dzie sustreŭsia z vice-meram Ryhi Ajnaram Šlesiersam i vykanaŭčym dyrektaram porta Leanidam Łohinavym. Adbyŭsia pradmietny dyjałoh, pryśviečany pierśpiektyvam realizacyi kankretnych dvuchbakovych uzajemavyhadnych prajektaŭ pa pieravałcy biełaruskich hruzaŭ, paviedamlaje pres-słužba.

BiełaPAN

Chočaš padzialicca važnaj infarmacyjaj ananimna i kanfidencyjna? Pišycie redaktaru «Našaj Nivy» ŭ TH