Pierad budynkam suda na vulicy Kirava, dzie kaliści znachodziŭsia licej imia Jakuba Kołasa, sabralisia liceisty, baćki i vypuskniki hetaj ustanovy.
«Sabralisia liceisty, baćki, pryjšło šmat vypusknikoŭ, niekatoryja ź ich vučacca ŭ zamiežnych krainach, niekatoryja ŭžo skončyli ŭniviersitety. Vielmi pryjemna było ŭsich ubačyć. Sabralisia kala budynka, dzie časova raźmiaščajecca Centralny sud. Darečy, u hetym sudzie sudzili niekatorych z vypusknikoŭ. Voś heta źjaŭlajecca simvałam našaj situacyi: sudzili pa nadumanych pryčynach, naprykład Franaka Viačorku, jaki taksama pryjšoŭ. Vystupili našyja liceisty, śpiavali himn. Prysutničaŭ i AMAP. Adnak, śviata adbyłosia. Zaraz my zajmajemsia padrychtoŭkaj da novaha navučalnaha hoda. Adznaču, što pryjšli i abituryjenty. Budziem spadziavacca, što i nadalej budziem trymacca razam i zajmacca hetaj spravaj, — raspavioŭ dyrektar liceja Uładzimir Kołas.
Jak adznačyŭ Uładzimir Kołas, siońniašniaje mierapryjemstva było simvaličnym pačatkam novaha navučalnaha hoda.Biełaruski Humanitarny licej raspačaŭ navučalny hod u kancy červienia ŭ Polščy, dzie liceisty mieli mahčymaść zajmacca ŭ Varšavie, Hdańsku, a taksama na Padlaššy ŭ narmalnych kłasach.
Nahadajem, što z 2003 hoda, paśla zakryćcia pa zahadzie ŭładaŭ, navučalnaja ŭstanova praciahvaje pracavać u nieaficyjnym statusie Biełaruskaha humanitarnaha liceja. Navučency samastojna vyvučajuć kurs siaredniaj škoły pa miescy žycharstva i zdajuć ispyty eksternam.
Zakryćcio liceja źviazvajuć z tym, što ŭ im była niezaležnaja, nieideałahizavanaja sistema adukacyi, a vykładčyki liceja byli krytyčna nastrojenyja da ŭładaŭ, staviačy sabie za metu vychavać sapraŭdnych patryjotaŭ Biełarusi, jakija viedajuć rodnuju movu i historyju.
Niahledziačy na vymušanuju apazicyju da sistemy adukacyi, u šerahu krainaŭ Jeŭropy mienavita Biełaruski humanitarny licej pradstaŭleny jak adzinaja niedziaržaŭnaja ŭstanova z navučańniem na rodnaj movie. Heta adna z pryčynaŭ, čamu vypuskniki liceja majuć mahčymaść praciahvać navučańnie praktyčna pa ŭsim śviecie.
