Žychar horada Baranavičy padazrajecca ŭ zabojstvie piacimiesiačnaj dziaŭčynki

Jak paviedamili ŭ śledčym adździele prakuratury Bresckaj vobłaści, 8 vieraśnia, a treciaj hadzinie nočy cieła dziciaci ź cialesnymi paškodžańniami ŭ vobłaści hałavy i tułava prynios na stancyju chutkaj miedycynskaj dapamohi ŭ Baranavičach 31-hadovy niepracujučy miascovy žychar. Jon zajaviŭ, što znajšoŭ dzicia na vulicy.

U dziaŭčynki byli vyjaŭlenyja: zakrytaja čerapna-mazhavaja traŭma, množnyja pierałomy kostak zvodu i asnovy čerapa, pierałomy piaci rebraŭ, siniaki i krovaźlićci ŭ miakkija tkanki šyi z prykmietami miechaničnaj aśfiksii.

8 vieraśnia pa fakcie śmierci dziciaci śledčym adździełam prakuratury Bresckaj vobłaści raspačata sprava pa p. 2 č. 2 art. 139 Kryminalnaha kodeksa (zabojstva zaviedama małaletniaha).

Pa padazreńni va ŭčynieńni zabojstva zatrymany mužčyna, jaki prynios dziaŭčynku na stancyju chutkaj miedycynskaj dapamohi.

Padčas papiaredniaha rasśledavańnia kryminalnaj spravy ŭstanoŭlena, što 7 vieraśnia jon raśpivaŭ śpirtnoje z baćkam dziciaci ŭ kvatery apošniaha. U kvatery taksama znachodziłasia babula zahinułaj dziaŭčynki. Maci dziciaci doma nie było.

Pryčynu śmierci dziaŭčynki vyznačaje sudova-miedycynskaja ekśpiertyza. Śledstvam ustanaŭlivajucca akaličnaści pryčynieńnia dziciaci cialesnych paškodžańniaŭ, jakija pryviali da śmierci.

Padazrony źmieščany ŭ izalatar časovaha ŭtrymańnia.

0

0

0

0

0

0

Łarysa Šyhanava, BiełaPAN

Chočaš padzialicca važnaj infarmacyjaj ananimna i kanfidencyjna? Pišycie redaktaru «Našaj Nivy» ŭ TH