10 vieraśnia ŭ 21.55 Pieršy kanał i spadarožnikavy telekanał «Biełaruś-TB» u pramym efiry pakažuć finał respublikanskaha dziciačaha konkursu «Pieśnia dla «Jeŭrabačańnia», u jakim voźmuć udzieł 11 junych vykanaŭcaŭ.
Jak paviedamlaje pres-słužba Biełteleradyjokampanii, pieramožca konkursu atrymaje prava pradstaŭlać Biełaruś na mižnarodnym dziciačym konkursie pieśni «Jeŭrabačańnie-2010», jaki projdzie 20 listapada ŭ Minsku.
Finalny hała-kancert nacyjanalnaha adboru tradycyjna arhanizavany pa pryncypie mižnarodnaha konkursu. Vystupleńni ŭdzielnikaŭ buduć aceńvać prafiesijnaje žury i hledačy (50% na 50%). Paśla padliku hałasoŭ junyja viadučyja sa studyj rehijanalnych teleradyjokampanij u pramym efiry nazavuć lidaraŭ hałasavańnia ŭ kožnaj z abłaściej Biełarusi.
U adpaviednaści ź losavańniem udzielniki vystupiać u nastupnym paradku: 1 — Mahamied Asłanaŭ ź pieśniaj «Źbiarom vakoł siabroŭ» (Hrodna), 2 — Jahor Čarnoŭ ź pieśniaj «Lady Viasna» (Mahiloŭ), 3 — Jana Kanaplanik z kampazicyjaj «Farby leta» (Minsk), 4 — Jahor Šarankoŭ ź pieśniaj «Ja tak chaču tancavać!» (Śvietłahorsk), 5 — Kryścina Sajko z kampazicyjaj «Rabi jak ja» (Hrodna), 6 — Kryścina Śviatličnaja ź pieśniaj «Śpiavaj!» (Minsk), 7 — Daniił Kazłoŭ z kampazicyjaj «Muzyki śviatło» (Žabinka), 8 — Lidzija Zabłockaja ź pieśniaj «Pryvitańnie» (Mahiloŭ), 9 — Julija Atroščanka z kampazicyjaj «Kupała» (Mazyr), 10 — Evielina Łašuk ź pieśniaj «Dziadulaŭ chit» (Minsk). Apošni numar u Alaksandry Stelmach z Hrodna, jakaja vystupić na konkursie z kampazicyjaj «Ty i ja».
Hledačoŭ finalnaha hała-kancerta čakaje niekalki siurpryzaŭ. Biełaruskija kankursanty dziciačaha «Jeŭrabačańnia» minułych hadoŭ — Ksienija Sitnik, Andrej Kuniec, Alaksiej Žyhałkovič, Jura Dziemidovič i inšyja — vykanajuć svaje konkursnyja kampazicyi duetam z prafiesijnymi biełaruskimi muzykantami. Akramia taho, finalisty konkursu hetaha hoda praśpiavajuć ahulnuju kampazicyju, napisanuju śpiecyjalna dla šou junym aŭtaram Kiryłam Jermakovym.
Taćciana Daraščonak, BiełaPAN
Chočaš padzialicca važnaj infarmacyjaj ananimna i kanfidencyjna?
Pišycie redaktaru «Našaj Nivy» ŭ TH
