U Nacyjanalnaj biblijateki pracuje vystava «Lepšyja knihi Biełarusi». Na joj pradstaŭleny pieramožcy konkursu «Mastactva knihi-2010».
Viktar Šnip trymaje samuju lepšuju knihu pa vynikach konkursu.
Pieramožca ŭ naminacyi «Za ŭniosak u zachavańnie duchoŭnaj spadčyny» — «Słuckaje Jevanhielle».
Udzieł u sioletnim konkursie pryniali 44 vydaviectvy, jakija prapanavali bolš za 250 vydańniaŭ pavyšanaj jakaści. Žury vybirała lepšych pa peŭnych naminacyjach. U ekspazicyi ž pradstaŭleny taksama vydańni-dypłamanty I, II i III stupieniaŭ.
Najbolšuju cikavaść, biezumoŭna, pryciahvajuć knihi, jakija adznačanyja jak samyja lepšyja. Što vydaŭcy značnaha zrabili za hod?
Z pradstaŭlenych knih vynikaje, što ŭ Biełarusi hałoŭnym zastajecca adno śviata — 9 maja.
Hran-pry atrymała «Nikohda nie zabudiem» («Mastackaja litaratura»). Kniha ŭpieršyniu źjaviłasia ŭ kancy 1940-ch. Jaje składajuć apoviedy biełaruskich dziaciej ab vajnie. Heta jaje trynaccataje pieravydańnie. Voś tolki nie zrazumieła, dla kaho takaja kniha pieravydajecca? U toj čas, jak sioleta ŭ «Mastackaj litaratury» vyjšła krychu bolš za dziesiatak knih, vyklikaje pytańnie metazhodnaść vypusku «Nikohda nie zabudiem». Viadoma ž, heta tak zvanaja sacyjalna značnaja litaratura, vypusk jakoj spansujecca dziaržavaj.
Jašče adno vydańnie pryśviečanaje vajnie — «Encikłopiedija Pobiedy. Biełaruś-Moskva» (Biełaruskaja Encykłapiedyi imia P.Broŭki) — stała pieramožcam u naminacyi «Naša Pieramoha». I hety tom u 800 staronak nie ciahnie na samaakupalny prajekt. A ŭtrymać u rukach takuju encykłapiedyju daloka i nie kožny vieteran zdoleje.
Lepšym vydańniem pa vyjaŭlenčym mastactvie — «Płakaty Vielikoj Otiečiestviennoj vojny» («Litaratura i Mastactva»). Vydańnie taksama datacyjnaje, pra što śviedčyć vysokaja jakaść i nizki košt (vydaviectva pradaje knihu ŭsiaho za 37133 rubloŭ).
Voś i atrymlivajecca, što
dziaržava sama vydaje knihi, a paśla sama siabie za ich i ŭznaharodžvaje.
Siarod pryvatnych vydaviectvaŭ, čyje knihi nazvali lepšymi, tolki adna biełaruskamoŭnaja.
Lepšaje litaraturna-masatckaje vydańnie — «Na dałoniach viečnaści» Anatola Buteviča i Uładzimira Jahoŭdzika («Kavaler»), lepšaje vučebnaje vydańnie — «Izobrazitielnoje iskusstvo. 1 kłass. Albom izdanij» i «Izobrazitielnoje iskusstvo. 2 kłass. Albom izdanij» («Aviersev»), lepšy albom — «Dikaja žizń v cientrie Jevropy» Siarhieja Płytkieviča («Ryf-tur»). Albom raźličany chutčej na turystyŭ, jak padarunkavaje vydańnie. Tamu i vydaviec adpaviedna staraŭsia zrabić jaho najbolš prezientabielnym. Dla padarunkaŭ padychodzić i pieramožca naminacyi «Ziamla maja» — «Ziemla siły. Biełoviežskaja puŝa» (Biełaruskaja Encykłapiedyja imia P.Broŭki).
Tom vahoj u paru kiłahramaŭ i canoj u niekalki socień tysiač rubloŭ dla chatniaha zboru «paciahnie» nie kožny čytač.
A pryvatnyja viedaviectvy, jakija śpiecyjalizujucca na vypusku biełaruskamoŭnaj knihi, adsutničajuć. Chutčej navat adsutničajuć naminacyja dla ich. Bo zrazumieła, što nievialikaje vydaviectva nie moža sabie dazvolić ukłaści ŭ niejki prajekt dziasiatki miljonaŭ rubloŭ. A biez hetaha kniha nie zdolnaja zachapić žury.
Siarod inšych pieramožcaŭ konkursu, jakich možna pabačyć na vystavie, —lepšy padručnik — padručnik pa anhlijskaj movie dla 3-4 kłasaŭ («Narodnaja aśvieta»), lepšaja dziciačaja kniha — «Kupalinka» («Mastackaja litaratura»), lepšaje navukovaje vydańnie — «Biełorusskij narodnyj kostium: kroj, vyšivka i diekorativnyje švy» («Biełaruskaja navuka»), lepšaja encykłapiedyja — «Historyi biełaruskaj knihi» Mikoły Nikałajeva (Biełaruskaja Encykłapiedyja imia P.Broŭki), lepšaje navukova-papularnaje vydańnie — «Carskije ochoty v Biełoviežskoj puŝie» («Biełaruś»), lepšaje masava-palityčnaje vydańnie — «Biełaruś: Narod. Hosudarstvo. Vriemia» («Biełaruskaja navuka»).
Vystavy pracuje ŭ halerei «Łabirynt» da 30 vieraśnia.
