Parłamiencka-prezidenckaja forma kiravańnia, madernizacyja ekanomiki, ščylnyja adnosiny z Rasijaj i Jeŭropaj dy inš.

Lidar hramadzianskaj kampanii «Havary praŭdu» aficyjna abviaściŭ pra svoj udzieł u prezidenckaj kampanii. Heta adbyłosia 16 vieraśnia a 8.30 u «Pacia Picy». Pradstaŭniki presy atrymali prajekt prahramy Niaklajeva na 2011-2015 hh, vykanany ŭ vyhladzie palityčnaha mieniu.

«Asnoŭnaj stravaj» prahramy Niaklajeva idzie palityčnaja i kanstytucyjnaja reforma. Paet abiacaje pierachod da parłamiencka-prezidenckaj formy kiravańnia, a taksama pašyreńnia paŭnamoctvaŭ i niezaležnaści miascovaj ułady.
Palityčnym partyjam harantujucca roŭnyja ŭmovy, presie — svaboda.

Milicyja i śpiecsłužby buduć vyzvalenyja ad nienaturalnych dla ich abaviazkaŭ.

U jakaści chałodnych zakusak Niaklajeŭ prapanuje pieraadoleńnie kryzisu, jaki daje šaniec na madernizacyju ekanomiki. Najpierš — raźvićcio małaha i siaredniaha biźniesu. I nie tolki ŭ śfiery pasłuh, ale i biźniesu intelektualnych technałohij.

Na haračaje — ekanamičnaja reforma jakuju, na dumku niaklajeŭcaŭ, niemahčyma pravieści biez vyviadzieńnia ź cieniu asnoŭnych finansavych patokaŭ. A tamu patrebnyja amnistyja kapitałaŭ i padatkaŭ, revizija pazabiudžetnych fondaŭ, viartańnie ŭ biudžet srodkaŭ, što išli ŭ abychod jaho (u tym liku srodki ad prodažu zbroi).

«Sacyjalny piroh» niemahčymy biez efiektyŭnaj ekanomiki.
Asnoŭnymi inhredyjentami «sacyjałki» ŭ prajekcie značacca reforma apłaty pracy, udaskanaleńnie padatkovaj palityki ŭ intaresach siamji, stymulavańnie naradžalnaści — ciemjam pry naradžeńni druhoha dziciaci abiacajuć vypłatu $25 000 (tut Niaklajeŭ zrabiŭ akcent na tryvožnaj demahrafičnaj statystycy — skaračeńni nasielnictva krainy na paŭmiljona čałaviek), paetapnaja reforma piensijnaj sistemy i h.d.
«Stravaj dnia» značycca daktryna adkaznaha susiedstva.
Pieršym punktam idzie rasijski napramak, dzie abiacajecca «pierazahruzka» adnosin. Na jeŭrapiejskim nakirunku Niaklajeŭ budzie dabivacca admieny sankcyj ES u dačynieńni da Biełarusi, spraščeńnia vizavaha režymu i h.d.
«Chleb nadzionny» Niakłajeva-prezidenta — strohaje vykanańnie ŭsich miždziaržaŭnych pahadnieńniaŭ z Rasijaj,
jakija zabiaśpiečvajuć adsutnaść mytnych vizavych abmiežavańniaŭ pamiž krainami i svabodnaje pieramiaščeńnie hramadzian, tavaraŭ i kapitałaŭ. Bo «Rasija dla značnaj častki našaha nasielnictva — krynica isnavańnia».
Lubimaja strava — pytańni nacyjanalnaj palityki i svabody vieravyznańnia, kultury i adukacyi.
Tut abiacajecca raźvićcio nacyjanalna-kulturnaj identyčnaści ŭsich nacmienšaściaŭ u spałučeńni z pryjarytetnaj padtrymkaj movy tytulnaj bolšaści. A taksama roŭnyja ŭmovy dla ŭsich kanfiesij. Sistemu adukacyi abiacajuć intehravać u ahulnajeŭrapiejskuju adukacyjnuju sistemu.
Kantrol naroda nad uładaj, z dapamohaj ŚMI ŭ tym liku, prazrystaść dziejnaści orhanaŭ ułady — taki harnir rychtuje «šef-povar» Niaklajeŭ da asnoŭnych «stravaŭ» svajho palityčnaha mieniu.

I jak ža biez «harčycy»: «Chakiej pakiniem chakieistam. Pracavać daviadziecca ŭsim».

Клас
Панылы сорам
Ха-ха
Ого
Сумна
Абуральна

Chočaš padzialicca važnaj infarmacyjaj ananimna i kanfidencyjna?