Medyki pryjšli da vysnovy paśla sudovaha ŭskryćcia, što rasiejski špijon Siarhiej Traćciakoŭ, jaki ŭ 2000 hodzie pierajšoŭ na bok amerykancaŭ i pamior niečakana ŭ červieni sioleta, udaviŭsia kavałkam miasa.
Siarhiej Traćciakoŭ.
Traćciakoŭ pamior 13 červienia ŭ Fłorydzie. Jamu było 53 hady. Pra jahonuju śmierć aficyjna paviedamili 9 lipienia, nie padajučy jaje pryčyny. U hetym samym miesiacy jahonaja žonka skazała žurnalistam, što śmierć Traćciakova nastupiła ŭ vyniku niečakanaha zatrymańnia dziejnaści serca, ale rašuča zapiarečyła čutkam, što mužaŭ sychod moh być vyklikany zamacham na jahonaje žyćcio.
Čutki pra toje, što Traćciakoŭ moh pamierci «z čyjojści dapamohaj», uzmacnilisia paśla taho, jak u lipieni premjer-ministar Rasiei Ŭładzimir Pucin skazaŭ paśla sustrečy z hrupaj vydvaranych z ZŠA rasiejskich špijonaŭ (medyjnaj vizytoŭkaj hetaj hrupy stała biznesoŭka Anna Čapman ź Ńju-Jorku), što «zdradniki Anny Čapman adkažuć pa zakonach specsłužbaŭ». Tady dzie-nidzie ŭ druku źjavilisia niepaćvierdžanyja zdahadki, što Siarhiej Trećjakoŭ moh być adnym z takich «adkazčykaŭ».
Pavodle Vikipedyi, Traćciakoŭ, jaki byŭ kadravym aficeram KHB, z 1995 hodu pracavaŭ jak namieśnik rezydenta rasiejskaj vyviedki ŭ Ńju-Jorku pad prykryćciom pasady pieršaha sakratara rasiejskaj dyplamatyčnaj misii pry AAN. U kastryčniku 2000 h. Traćciakoŭ źnik ź Ńju-Jorku razam z žonkaj, dačkoj i katom. Pra toje, što Traćciakoŭ pierajšoŭ na amerykanski bok, zachodnija ŚMI paviedamili ŭ studzieni 2001.
Za infarmacyju, jakuju Traćciakoŭ pieradaŭ CRU i FBR, jon nibyta atrymaŭ dva miljony dalaraŭ — pavodle Vikipedyi, heta adna z najbolšych sumaŭ, jakuju amerykanski ŭrad kali-niebudź vypłaciŭ špijonu-pierabiežčyku. U 2007 Traćciakoŭ atrymaŭ amerykanskaje hramadzianstva.
U 2008, z dapamohaj amerykanskaha žurnalista, Traćciakoŭ vydaŭ knižku, u jakoj apisaŭ svaju špijonskuju dziejnaść.
U svajoj knižcy Traćciakoŭ śćviardžaŭ, miž inšym, što namieśnikam dziaržsakratara ZŠA Stroŭbam Tełbatam u administracyi prezydenta Biła Klintana manipulavali rasiejskija vyviedniki i što Tełbat byŭ «nadzvyčaj kaštoŭnaj krynicaj vyviednaj infarmacyi».
Pavodle Traćciakova, pierad raspadam Savieckaha Sajuzu tahačasny kiraŭnik KHB Uładzimir Kručkoŭ vyviez za miažu hrošy KPSS na ahulnuju sumu 50 miljardaŭ dalaraŭ.
Traćciakoŭ jašče ćvierdziŭ, što ŭ pačatku 1990-ch jon sustrakaŭsia z rasiejskim biznesmenam, jaki pryznaŭsia jamu, što doma maje «pryvatnuju» jadziernuju bombu.
Traćciakoŭ taksama apisaŭ, jak jon pasyłaŭ aficeraŭ rasiejskaj vyviedki (SVR) u Ńju-Jorkskuju publičnuju biblijateku, dzie jany zajmalisia rassyłkaj prapahandysckich i dezinfarmacyjnych materyjałaŭ, padrychtavanych u Maskvie, praź internet roznym amerykanskim sajtam dy tele- i radyjokanałam.
Siońniašniaje vydańnie International Herald Tribune, paviedamlajučy ab vyniku ŭskryćcia cieła Traćciakova, piša, što Traćciakoŭ taksama ćvierdziŭ, što jahonyja ahienty dapamahli rasiejskamu ŭradu skraści kala 500 miljonaŭ dalaraŭ z prahramy AAN u Iraku «nafta za charčavańnie».
