U Histaryčnym muziei adkryłasia vystava, pryśviečanaja Isaku Sałaviejčyku.
My viedajem, što Arkadź Kulašoŭ, hetaksama jak Jakub Kołas i Janka Kupała, lubiŭ hulaŭ u šachmaty. My viedajem, jak vyhladaŭ pieršy Ŭsiebiełaruski stadyjon, jaki mieściŭsia ŭ Parku Čaluskincaŭ i zhareŭ u 1941. A jašče my ŭjaŭlajem, jak vyhladali ciapier źnikłyja vułki davajennaha Minsku. Usio hetyja ryski da našaj historyi zachavalisia dziakujučy fatohrafu Isaku Sałaviejčyku.
Isak Sałaviejčyk (1890-1967) — fatohraf u trecim pakaleńni.
Jahony dzied byŭ ułaśnikam fotaatelje ŭ Biełastoku, Hrodnie, Niaśvižy i Słonimie.
Jaho baćka — viadomy fotamastak, jaki napačatku stahodździa atrymlivaŭ miedal na vialikaj fotavystavie ŭ Antvierpienie ŭ 1906 h.
Sam Isak daŭnija hady byŭ fotakaram u papiaredniku «Biełaruśfilma», «Biełdziaržkino», i ŭ časopisie «Čyrvonaja Biełaruś». Sałaviejčyk — adzin z aŭtaraŭ pieršaha ŭ SSSR fotaalboma — «Biełaruś Savieckaja».
U darobku Sałaviejčyka — zdymki davajennaha i pavajennaha Minska, pryrody, znakavyja ludzi biełaruskaj kultury: litarataraŭ Ivana Mieleža i Vitala Volskaha, skulptara Andreja Biembiela, kampazitara Andreja Cikockaha.
Padčas zachopu Polščy i ŭźjadnańnia Uschodniaj i Zachodniaj Biełarusi Sałaviejčyka zdymaŭ rodnuju Biełastoččynu, praŭda, zbolšaha rabiŭ prapahandysckija zdymki.
Što da prapahandy: mienavita Sałaviejčyk prydumaŭ dziela nadańnia šeściu masavaści zdymać vialiki natoŭp krychu źvierchu. Heta my pra viadomy zdymak maršu vajskovaj čaści, jakoj kamandavaŭ Rakasoŭski, pa vułkach Minsku. Hetuju rakurs dahetul vykarystoŭvajuć postsavieckija fatohrafy.
Z 20-ch i 30-ch hadoŭ nie zachavałasia šmat fatahrafijaŭ. Pieršaja pryčyna — padčas vajny zhareli archivy (u tym liku i archiŭ Sałaviejčyka). Pa-druhoje, chvala represijaŭ u dačynieńni da fotamastakoŭ, ačolnikaŭ kirunku savieckaha piktaryjalizmu.
— Sałaviejčyk pracavaŭ u vidavočna niespryjalnyja dla fatahrafii 30-yja, kali čałavieka z fotaaparatam na vulicy mahli zaličyć da špijona, a na fotaaparaturu treba było mieć aficyjny dazvoł, — kaža viadomy fotamastak Juryj Vasiljeŭ. — Ale Isak Vosipavič dažyŭ da 60-ch hadoŭ, kali moh ciešycca sa svajoj viadomaści i pieradavać dośvied maładym. Sałaviejčyk navat zrabiŭsia pieršym mastackim kiraŭnikom fotakłuba «Minsk», ciapier samaha staroha i šanavanaha fotakłuba na postsavieckaj prastory.
Tvory Isaka Sałaviejčyka možna ŭbačyć u Histaryčnym muziei (Marksa, 12) na vystavie «Fatohraf svajho času». Akramia aŭtarskich pracaŭ, tut — daŭnija zdymki Biełastoka, Viciebska i Hrodna, a taksama aŭtentyčnyja časopisy i drukavanyja vydańni 30-ch hadoŭ. Vystava praciahniecca da 31 kastryčnika.
