Minułaha pieraharnuŭ hady,
Uśmieška aśviatlała ŭspaminy,
Płyli ŭ ružovaj kviecieni sady,
I u błakicie chor śpiavaŭ ptušyny
Pra pryhažość hareźlivaj žančyny,
Minułaha pieraharnuŭ hady.
U vieraśni — daždžy i chałady,
Raznosić viecier sumnyja naviny,
U niebie chmary — čorny znak nudy,
I pa asfalcie mokryja mašyny
Raspyrskvajuć strumieńčyki vady,
U vieraśni — daždžy i chałady.
Doždž płača, pakidajučy ślady,
Viatryska dreŭ razhojdvaje haliny,
Ŭ travu pavolna padajuć płady,
Zusim sivy, daŭno niemałady,
Staju adzin la vosieńskaj ściažyny,
Doždž płača, pakidajučy ślady.
Mnie da carkvy — chviliny dźvie chady,
Ja za paroham ścipłaje chaciny,
Hučać zvany — ŭračystaściu krainy,
I paśviatleli sioły, harady,
U Božy chram niasu svaje praviny,
Da viečnaści — chviliny dźvie chady…