Biełaruskija kamunalniki skrali ideju va ŭkrainskich.
Ad novych mietadaŭ baraćby ź niepłacielščykami za kvateru pakutujuć susiedzi.
Jakich tolki mietadaŭ nie prydumvali dla zmahańnia ź vinavatymi za kamunałku! Prydumali novy — adklučeńnie kanalizacyi.
Bieź śviatła i hazu pražyć možna, biez vady — składaniej. A voś biez tualeta…. Žurnalist «NN» adpraviŭsia ŭ hości da siamji, jakoj adklučyli prybiralniu.
Zvyčajny dzieviacipaviarchovik na vulicy Žudro, šosty pavierch. Dźviarej nichto nie admykaje — navat varušeńnia niama.
Susiedzi kažuć: ci pajšli ŭ kramu pa ałkahol, ci śpiać.
— U ich tut viesieła. My daŭno ich nie bačyli ćviarozymi. Byvaje, śpiać la lifta, davodzicca pierastupać.
Ab prablemach hetaj kvatery viedaje ŭvieś padjezd.
— Spačatku im śviatło adklučyli — jany pa viečarach pili ŭ padjeździe, tut lampačka jość. Tak što im niama roźnicy, dzie pić. Paśla haz — dyk jany i tak nie varyli jeści. A voś ciapier kanalizacyju.
— I što, da vas pajšli?
— Nie, da nas nie chodziać. Jany vykarystoŭvali śmiećciepravod. Ale my ich pahaniali, i jany ciapier sychodziać kudyści — na vulicu chiba što. Dziakuj bohu, padjezd prapachnuć nie paśpieŭ.
Na paŭtorny zvanok u dźviery nichto nie adkazvaje.
Jak bačym, niekatoryja hramadzianie mohuć abychodzicca biez prybiralni, a pakarańnie dla ich pieratvarajecca ŭ karu dla ŭsiaho astatniaha padjezda.
Dyrektar unitarnaha pradpryjemstva «Haradskaja avaryjnaja słužba» Viktar Karaloŭ kaža, što ŭsiaho ŭ Minsku ciapier adklučany ad kanalizacyi 38 kvater. A voś raspłacilisia za pasłuhi paśla pahrozy adklučeńnia kanalizacyi sotni haspadaroŭ. U Pieršamajskim rajonie adklučyli kanalizacyju ŭ adnoj kvatery, dyk haspadar praz paŭhadziny raźličyŭsia.
Z voś antysanitaryja, jakaja ŭtvarajecca ŭ kvaterach z adklučanaj kanalizacyjaj, heta ŭžo padstava dla ŽESa, kab padavać na ich u sud.
Tamu kamunalnik miarkuje, što novy mietad uździejańnia na niapłatnikaŭ efiektyŭny i patrebny.