Naryškin: Adnaŭleńnie adnosinaŭ z Łukašenkam mahčymaje abnaŭlajecca 22

«Kantakty Rasii ź biełaruskaj apazicyjaj mahčymyja. Pryznańnie prezidenckich vybaraŭ budzie zaležać nie ad taho, kaho abiaruć, a ad spraviadlivaści pracedury vybaraŭ». Jak pieradaje z Maskvy karespandent «Našaj Nivy» Źmicier Pankaviec, pra heta zajaviŭ kiraŭnik Administracyi prezidenta Rasii Siarhiej Naryškin na sustrečy ź biełaruskimi žurnalistami.

Jana adbyłasia ŭ Maskvie siońnia, 13 kastryčnika.

«Palepšyć adnosiny možna i z hetym kiraŭnikom», — zaznačyŭ Naryškin. Pavodle jaho słoŭ, dla hetaha ŭ Minsku pavinny «ŭśviadomić škodu toj palityki», jakaja ŭ apošni čas «pravodziłasia ŭ dačynieńni da sajuznaj dziaržavy i rasijska-biełaruskich adnosinaŭ».

U toj ža čas «nam nie ŭsio roŭna, jaki vybar zrobić biełaruski narod na prezidenckich vybarach, — zajaviŭ Naryškin. — Heta šmat u čym vyznačyć budučyniu biełaruska-rasijskich adnosin», — padkreśliŭ jon.

Kiraŭnik Administracyi prezidenta Rasii adznačyŭ, što viedaje «siakija-takija proźviščy» apazicyjnych kandydataŭ u prezidenty Biełarusi, ale nie robić na heta akcentu. «Upeŭnieny, što bolšaść biełaruskich vybarščykaŭ buduć hałasavać nie tolki za peŭnaha kandydata, ale i za palityčny kurs, jakoha hety kandydat budzie trymacca pry vybudoŭvańni adnosin pamiž našymi krainami», — spadziajecca Naryškin.

Ciapierašniaje biełaruskaje kiraŭnictva sprabuje rastłumačyć vybarščykam pamyłki i praliki svajoj sacyjalna-ekanamičnaj palityki nibyta niedružalubnymi krokami z boku Rasiei, zajaviŭ Naryškin. Adnak, pavodle jaho słoŭ, heta asprečvajecca abjomami dapamohi, jakuju Rasieja akazała Biełarusi za 10 hadoŭ, asabliva ŭ sensie pastavak enierhanośbitaŭ. Naryškin, u pryvatnaści, nazvaŭ sumu 50 młrd dalaraŭ.

U toj ža čas, na dumku Naryškina, «biełaruski bok abvinavačvaje rasiejski ŭ parušeńni pryncypaŭ sajuznaha budaŭnictva i, pa sutnaści, sabatuje bujnyja prajekty ŭ ramkach sajuznaj dziaržavy, — zajaviŭ Naryškin. — Va ŭmovach raspačataj pieradvybarčaj kampanii ŭ Biełarusi paproki ŭ naš adras u apošni čas pierajšli ŭ adkrytuju łajanku i abrazy rasiejskaha kiraŭnictva. Prykładam stała pres-kanfierencyja Alaksandra Łukašenki 1 kastryčnika», — skazaŭ Naryškin.

Na jaho dumku, takija zajavy «źjaŭlajucca sprobaj razburyć napracavanyja suviazi, ŭbić klin u družalubnyja adnosiny pamiž dźviuma krainami».

«Ščyra chaciełasia b, kab u dziejańniach biełaruskaha kiraŭnictva ŭziaŭ vierch kurs na ŭzajemadziejańnie z Rasijaj, umacavańnie družalubnych adnosin, adnaŭleńnie atmaśfiery davieru», — zajaviŭ Naryškin.

Kiraŭnik Administracyi prezidenta Rasii adkazaŭ i na pytańnie pra źniknieńnie viadomych asobaŭ u Biełarusi. Jon zaznačyŭ, što, kali heta pytańnie nie padymałasia aficyjna, to heta nie značyć, što jano nie chvaluje rasijan.

Adkazvajučy na pytańnie, ci hatovaja Rasieja budavać novyja partniorskija adnosiny z novym prezidentam Biełarusi, Siarhiej Naryškin zajaviŭ: «Rasieja hatovaja na samaje šyrokaje supracoŭnictva z novym prezidentam Biełarusi ŭ duchu partniorstva i adkrytaści».

* * *

Rasiejskija ŭłady vyrašyli rastłumačyć svaju pazicyju ŭ kanflikcie z Łukašenkam naŭprost. Žurnalistaŭ biełaruskich niezaležnych ŚMI druhi raz za hod zaprasili ŭ Kreml. Hetym razam z žurnalistami sustreniecca kiraŭnik Administracyi prezidenta RF Siarhiej Naryškin.

Biełarusaŭ čakajuć u redakcyi ahienctva RIA «Novosti» 13 kastryčnika. Siarod inšych u pres-kanfierencyi voźmie ŭdzieł i reparcior «Našaj Nivy» Źmicier Pankaviec. Zaprošanyja i inšyja niezaležnyja haziety, i internet-partały.

Nijakich papiarednich umovaŭ niama. Pytańni zahadzia ŭzhadniać nie treba.

Pa zaprašeńni Kramla na sustreču z kiraŭnikom Administracyi prezidenta RF prybyli 24 žurnalisty ad dziaržaŭnych i niedziaržaŭnych ŚMI. U ich liku — pradstaŭniki haziet «Biełorusy i rynok», «Novy čas», «Sovietskaja Biełoruśsija», «Narodnaja vola», «Narodnaja hazieta», «Komsomolskaja pravda» v Biełoruśsii», «BiełHazieta», «Naša Niva», «Źviazda», infarmacyjnaj kampanii BiełaPAN, infarmahienctvaŭ ITAR-TASS i BiełTA, telekanałaŭ ONT, STV, «Rośsija», NTV, Pieršaha kanała (Biełaruś) i Pieršaha kanała (Rasija), interniet-sajtaŭ tut.by, charter97.org, imperiya.by, gazetaby.com, belaruspartisan.org, zapraudu.info.

Žurnalisty pryjechali za košt arhanizacyj, jakija ich kamandziravali.

Nahadajem, 1 kastryčnika Alaksandr Łukašenka daŭ pres-kanfierencyju dla pradstaŭnikoŭ rasijskich rehijanalnych ŚMI, jakija byli zaprošany ŭ Biełaruś dla ŭdziełu ŭ pres-tury. Biełaruski kiraŭnik rezka raskrytykavaŭ kiraŭnictva Rasii. Reakcyjaj u adkaz staŭ zapis 3 kastryčnika prezidenta RF Dźmitryja Miadźviedzieva ŭ videabłohu, jaki jon pryśviaciŭ dvuchbakovym adnosinam.

Biełaruskich žurnalistaŭ zaprašajuć u Maskvu ŭžo druhi raz. 23 listapada 2009 hoda ŭ rezidencyi «Barvicha» Dźmitryj Miadźviedzieŭ upieršyniu sustreŭsia z pradstaŭnikami niedziaržaŭnych i dziaržaŭnych maśmiedyja Biełarusi. Aficyjna sustreča była prymierkavana da 10-hodździa stvareńnia sajuznaj dziaržavy, a taksama vizitu Miadźviedzieva ŭ Minsk 27 listapada dla ŭdziełu ŭ Miždziaržsaviecie JeŭrAzES.

Padčas pres-kanfierencyi rasijski prezident prapanavaŭ zrabić znosiny ź biełaruskimi žurnalistami rehularnymi. «U mianie takoje adčuvańnie, što my mała sustrakajemsia, — skazaŭ Miadźviedzieŭ. — A heta nie vielmi dobra, tamu što infarmacyja, jakoj pavinny vałodać našy hramadzianie, pastupaje da ich ź niejkich uskosnych krynicaŭ».

Varta zaznačyć, što letašniaja pres-kanfierencyja taksama adbyłasia paśla sustrečy Alaksandra Łukašenki z rasijskimi žurnalistami ŭ Minsku (2 kastryčnika).

Źmicier Pankaviec, Maskva; inf. BiełaPAN

Chočaš padzialicca važnaj infarmacyjaj ananimna i kanfidencyjna? Pišycie redaktaru «Našaj Nivy» ŭ TH