Ministr sportu: 25 miedaloŭ na Alimpijadzie ŭ Łondanie — pasilnaja zadača

Zavajova 25 miedaloŭ, u tym liku piaci załatych, na letniaj Alimpijadzie 2012 hoda ŭ Vialikabrytanii — pasilnaja zadača dla biełaruskich spartsmienaŭ,

zajaviŭ ministr sportu i turyzmu Aleh Kačan na adkryćci alimpijskaha pres-centra«Łondan-2012» u štab-kvatery NAK 17 listapada.

Pavodle jaho słoŭ, kandydatami ŭ alimpijskuju zbornuju źjaŭlajucca 353 spartsmieny ŭ 31 vidzie. Raspracavany kompleksnyja i indyvidualnyja płany padrychtoŭki, idzie atestacyja nacyjanalnych kamand. Pieršyja dźvie alimpijskija licenzii zavajavali strałki Siarhiej Martynaŭ i Viktoryja Čajka. U hetym vidzie płanujecca zavajova jašče troch-čatyroch licenzij, a na Alimpijadzie — dvuch miedaloŭ, paviedamiŭ hałoŭny trenier kamandy Ihar Basinski.

Jak vykazaŭsia Aleh Kačan, «ściažki materyjalnaha stymulavańnia rasstaŭleny». 1 listapada ŭźniata zarpłata trenieraŭ. Ukazami prezidenta zaćvierdžany pamiery pryzavych za alimpijskija miedali

(150, 75 i 50 tys. dołaraŭ ZŠA)

i pałažeńnie ab imiannych stypiendyjach spartsmienam.

Ministr ukazaŭ na nieabchodnaść zavajovy bolšaj kolkaści miedaloŭ u alimpijskich dyscyplinach na čempijanatach śvietu i Jeŭropy. Sioleta ajčynnyja spartsmieny atrymali 13 miedaloŭ na suśvietnych i 11 — na jeŭrapiejskich pieršynstvach.

Pieršy vice-prezident NAK pamočnik prezidenta pa pytańniach fizičnaj kultury, sportu i raźvićcia turyzmu Ihar Zaičkaŭ zajaviŭ, što praces padrychtoŭki da łondanskaj Alimpijady «znachodzicca pad kantrolem prezidenta, NAK i Minsportu». Praviedziena sustreča z pasłom u Vialikabrytanii Alaksandram Michnievičam pa pytańniach raźmiaščeńnia i ŭdziełu biełaruskich spartsmienaŭ u Alimpijskich hulniach. «Nichto nie kaža, što ŭsio hładka. Jość prablemy z peŭnymi kamandami i spartsmienami pa invientary, farmakałohii, ale my starajemsia ich vyrašać», — skazaŭ Zaičkaŭ.

Na adkryćci alimpijskaha pres-centra byli ŭručany padarunki i dypłomy sponsaram NAK. Varta taksama zaznačyć, što na mierapryjemstva Aleh Kačan pryjšoŭ z raśsiečanaj skułaj i siniakom na joj. Pavodle słoŭ ministra, traŭma była atrymana na chakiei. «U chakiej hulajuć sapraŭdnyja mužčyny», — nahadaŭ žurnalistam Kačan radok ź pieśni.

9 krasavika na Alimpijskim schodzie Alaksandr Łukašenka zajaviŭ, što zavajova 25 miedaloŭ na letnich Alimpijskich hulniach źjaŭlajecca «absalutna dasiahalnaj rečču». «Kali b nie było tych pravałaŭ, jakija byli, my mahli b 25 miedaloŭ zavajavać, — miarkuje jon. — U nas jość umovy, i ludziej u nas dastatkova. Ja ž nie prašu ŭ vas 100 miedaloŭ na Alimpijadzie — 25. 25 — my za hetuju ličbu pavinny ŭčapicca, heta dla nas śviataja ličba pavinna być. I bolš prasić nie budu. Niachaj budzie 25 miedaloŭ, i piać ź ich załatych. Heta budzie vierch. I da piaci miedaloŭ na zimovych Alimpijskich hulniach. Try jość. Što, nie možam? Možam».

Dźmitryj Ułasaŭ, BiełaPAN

Chočaš padzialicca važnaj infarmacyjaj ananimna i kanfidencyjna? Pišycie redaktaru «Našaj Nivy» ŭ TH