«U nas niama nieabchodnaści devalvavać nacyjanalnuju valutu»,
— zajaviŭ Alaksandr Łukašenka, adkazvajučy 17 śniežnia na pytańni žurnalistaŭ paśla naviedvańnia centralnaha schovišča Nacyjanalnaha banka.
Jon adznačyŭ, što «razumny čałaviek, u jakoha byli sumnieńni i napružańnie», pačaŭ dumać u zusim zvarotnym kirunku paśla taho, jak «my vytrymali pachod ludziej u banki dla abmienu našaj valuty na zamiežnuju».
«My ŭsich zadavolili. Jak tolki ludzi ŭbačyli, što my zdolnyja zadavolić popyt, heta chvala pajšła na spad», — skazaŭ Łukašenka. Jon taksama padkreśliŭ,
što stanoŭčy ŭpłyŭ na situacyju na valutnym rynku Biełarusi akazali padpisanyja ŭ Maskvie pahadnieńni.
«Taksama toje, što ja ŭbačyŭ u schoviščy, havoryć pra toje, što ŭ nas dastatkova zołatavalutnych reziervaŭ, kab zadavolić luby popyt na valutu.
Treba žyć spakojna, hladzieć u budučyniu, pierśpiektyvy ŭ nas niakiepskija»,
— ličyć biełaruski kiraŭnik.
Adkazvajučy na pytańnie, ci płanujecca pavyšeńnie cen na pasłuhi ŽKH, Łukašenka nahadaŭ pra rašeńnie, što ich košt na praciahu hoda nie pavinien raści bolš čym na piać dołaraŭ. Pry hetym jon padkreśliŭ, što, niahledziačy na pavyšeńnie zarpłaty, ceny na pasłuhi ŽKH nie buduć pavyšacca praparcyjanalna jaje rostu.
«My pavysili zarpłatu na 30%, ekanomika naša spraŭlajecca. My dali hrošaj pad Novy hod, ludzi pojduć u mahaziny, kupiać štości sabie i dzieciam, układuć hetyja hrošy ŭ biełaruski tavar, što padhonić raźvićcio ekanomiki. Voś mudraść hetaha rašeńnia», — zajaviŭ Łukašenka.
