Supracoŭniki milicyi zatrymali lidera «Maładoha frontu» Źmitra Daškieviča, paviedamlaje radyjo «Svaboda». Heta adbyłosia, jak tolki chłopiec vyjšaŭ z padjezda doma. Vidavočcy paviedamili, što da jaho padbiehli ludzi ŭ cyvilnym.
Źmicier sprabavaŭ patłumačyć, što ŭ ich niama padstavaŭ jaho zatrymlivać. Ale chłopca skrucili i zakinuli ŭ mikraaŭtobus siniaha koleru.
Paplečniki Daškieviča miarkujuć, što, pakolki zatrymańnie adbyłosia na terytoryi Frunzienskaha rajona, lider «Maładoha frontu» ŭtrymlivajecca ŭ pastarunku Frunzienskaha RUUS.
Da moładzievaj aktyvistki Paŭliny Dziakavaj milicyjanty siońnia pryjšli dachaty i prynieśli na podpis prakurorskaje papiaredžańnie ab niedapuščeńni parušeńnia zakanadaŭstva ab masavych mierapryjemstvach. Dziaŭčyna admoviłasia jaho padpisać.
Taksama milicyjanty sprabavali trapić u žytło moładzievych aktyvistaŭ Źmitra Chviedaruka, Mikoły Dziemidzienki i Kaciaryny Ludvih.
«Milicyjanty prasili i mianie adamknuć dźviery, kab «pahavaryć». Praŭda, pra što — nie kazali», — raspaviadaje Z.Chviedaruk. Jon nie viedaŭ, ci na momant razmovy z karespandentam «NN» pravaachoŭniki syšli ź jaho padjezda. Chviedaruk aceńvaje siońniašnija vizity i zatrymańnie Daškieviča jak sprobu nacisnuć na aktyvistaŭ napiaredadni Płoščy.