Viečaram 20 śniežnia kandydat u prezidenty ad partyi BNF Ryhor Kastusioŭ raspavioŭ žurnalistam ab padrabiaznaściach zatrymańnia i načy, praviedzienaj pad vartaj.
«Paśla ŭdaru pa hałavie dubinkaj amapaŭca ja z dapamohaj vypadkovych ludziej syšoŭ z płoščy. My sieli ŭ aŭtamabil i sprabavali vyjechać, adnak užo praź niekalki kvartałaŭ aŭtamabil spyniła DAI. Mianie vyvieli z mašyny i adrazu pasadzili ŭ inšuju», — raspavioŭ spadar Ryhor.
Jon taksama paviedamiŭ, što paśla niekalkich pierajezdaŭ apynuŭsia ŭ znakamitaj «amierykancy» — unutranaj turmie KDB — dzie vypadkova pabačyŭ Andreja Dźmitryjeva (kiraŭnika štabu Niaklajeva), a taksama niekalkich maładych ludziej, jakich nie paznaŭ.
«Aformili pratakoł ab zatrymańni na troje sutak. Kala šostaj hadziny ranicy zaviali ŭ kamieru. Adnak siońnia, paśla intervju BT, adpuścili», — zajaviŭ Ryhor Kastusioŭ.Kandydat ad partyi «BNF» vystupiŭ z krytykaj siužetu ź jaho ŭdziełam, pakazanaha na biełaruskim telebačańni. Ryhor Kastusioŭ zaznačyŭ, što «akcyja była sapsavanaja pravakatarami, adnak zaraz nielha dakładna skazać, što za ludzi heta byli, na kaho jany pracavali». «U nas uźnikła šmat pytańniaŭ. Całkam vierahodna, što pravakacyi byli spravaj ruk śpiecsłužbaŭ», — zajaviŭ Kastusioŭ.
Na pres kanfierencyi taksama było zaznačana, što BNF vystupaje vyklučna za mirnaje vyrašeńnie prablemaŭ i ličyć, što vybary prezidenta Biełarusi nie mohuć być pryznanymi mižnarodnaj supolnaściu. «Partyja BNF uskładaje adkaznaść za razhon mirnaj manifiestacyi na biełaruskija ŭłady. My ličym, što vyniki vybaraŭ nie mohuć być pryznanyja mižnarodnymi strukturami, a taksama zaklikajem vykazać salidarnaść z usimi zatrymanymi», — zajaviŭ Kastusioŭ.
